Con Oto Florian l’é se n jit n toch de storia

Data

29 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Nadal de manconia a Poza, con la mort de Oto Florian de 91 egn fondator de la Federazion di Studafech del Trentin, e de Fabio Locatin de Ciadin, maester de schi de 67 egn.

La manconia à tocià doi majons de Poza proprio da Nadèl. En mercol ai 27 de dezember la comunanza de duta la val e n muie de studafech, rué ence da dut l Trentin, à tout pèrt te gejia de Poza a la messa de obito de Oto Florian, conzelebrèda te gejia de Poza da don Andrea Malfatti e da don Mario Bravin.

Con Oto l’é se n jit n toch de storia de Fascia e di Studafech: l’aea 91 egn e l’é stat comandant e ispetor carismatich del distret ladin dal 1955 al 1991 ma soraldut, coche à recordà a la fin de la messa l’ex president de la Federazion Franco Brighenti, l’é stat un di 12 Comandanc che ai 17 de dezember del 1954 i à metù sù la Federazion provinzièla di Studafech del Trentin, e l’era l’ùltim amò vif.

La fegura de Oto é stata recordèda ence da etres entervegnui desche chela de n om de chi “da mont e da n’outa”, che se à semper dat jù per la comunanza (l’é stat ence ombolt de Poza) e l’à lascià l segn più coi fac che con la paroles: n ejempie de galantom, fidabol e capaze.

L comandant di Studafech de Poza Andrea Winterle ge à sport n salut pien de comozion, domanan che Oto, sun Paradis, l ge porte n salut a so pare, Hanzi Winterle, ence el fegura storica di Studafech de Fascia se n jit da pech più che trei meisc, ai 14 de setember.

Oto l lascia la fies Carla, enciasèda foradecà, Mirella, sorastanta de la Scola de Fascia, e Lorenza ensegnanta e femena del conseier ladin Bepe Detomas, che à portà la paroles de rengraziament a la fin de la zerimonia.

L dì dò, en jebia ai 28, la comunanza de Poza e de val se à endò binà te na zerimonia mestia per ge sporjer l’ùltim salut a Fabio Locatin de Ciadin. Fabio, maester de schi de 67 egn, en vea de Nadèl, canche l’era sun Bufaure a fèr scola de schi, l’à ciapà l bot. L’é stat portà sobito a Trent ma no l’é stat nia da fèr per l salvèr, e dò duc i ejames pervedui l’é ruà l’autorisazion a la sepoltura, a chela che à tout pèrt ence si coleghes maestres de schi e i raprejentanc de la Schützencompanie de Fascia, de chela che Fabio l’era un di fondadores e l fajea pèrt da 33 egn.

Fabio l lascia la femena Hilde e i fies Bernd, Erich e Cindy.

Che i pausse te la pèsc del Segnoredie.

 (lg)