Sèn Jan: aproé Statut, stem e confalon

Data

29 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 28 de dezember se à binà per l’ùltima outa i Consees de Comun de Vich e de Poza per i ultimes adempimenc. Col prum de jené pea via l nef Comun.

L ciampanil gotich de la veiora Pieif de Sèn Jan e la Torns del Vaiolet, apede a la Veisc e trei steiles de òr l’é i elemenc che fegura, stilisé, sul nef stem del Comun de Sèn Jan. L’é stat aproà, adum col Statut e l confalon, dai Consees de Comun de Vich e de Poza, che i se à binà duc doi per l’ùltima outa en jebia ai 28 de dezember per i ultimes adempimenc da tor da la doi aministrazions dant che pee via l nef Comun de Sèn Jan.

L stem é stat dessegnà da l’artist de Sèn Jan Alberto Detomas che l’à tout sù i referimenc del studie e de la relazion storica su la carateristiches del teritorie del nef Comun fat dal professor Cesare Bernard. L ciampanil, fat sù coi contribuc de la families de Vich e de la val, l’é l prum referiment sozièl de la cristianità de Fascia, simbol cognosciù e identificatif. L’èga de la Veisc, che con si ruves passa fora e lea adum duta la val, e la Torns del Vaiolet, monc de nonzech cognosciui te dut l mond, l’é i etres doi elemenc carateristiches e emportanc del teritorie, e la trei steiles de òr recorda la Regoles di trei paìjes de Vich, Poza e Pera. Dut con i colores brun, bianch e vert, che recorda chi de la bandiera ladina, simbol de noscia partegnuda storica. I medemi trei colores i é ence te trei fasces sul confalon del nef Comun (descheche l’é sul confalon del Comun de Cianacei) olache te mez é logà apontin l stem, che é cercenà dai rames de orèr e de rover e l’à soravìa la corona, descheche é pervedù da l’araldica.

N gran develpai ge é stat sport da l’ombolt Giulio Florian tel cors del Consei de Comun de Poza a l’artist Alberto Detomas, che aea abù l’encèria de dessegnèr l stem e l’à volù sporjer sia opera desche don per l nef Comun, zenza aer nesciun paament. N develpai é jit ence al prof. Cesare Bernard, che à fat i studies per i elemenc del stem e ence duta l’introduzion storica del Statut, e al grop de lurier che à lurà fora i 67 articol del document: apede ai doi ombolc Giulio Florian e Leopoldo Rizzi l’era i conseieres del Comun de Poza Simone Zulian e Norbert Bernard e chi del Comun de Vich Bruno De Nardin e Franco Lorenz.

Col prum de jené nasc donca l nef Comun d Sèn Jan, l maor de Fascia, che sarà ret dal Comissar Antonio Paolo Arman enscin al meis de mé, canche vegnarà endrezà la litazions di neves aministradores.

De più su La Usc stampèda de vender ai 5 de jené 2018. 

 (Lucia Gross)