16 quintai de magnadiva per l Perù

Data

21 de fauré 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Te duta la scoles de Fascia l’é stat metù a jir ence chest an la regoeta de magnadiva en colaborazion con la sociazions de solidarietà internazionèla Freinademetz-Mato Grosso.

Dai 22 ai 26 de jené te Scola Ladina de Fascia l’é stat endrezà la “regoeta de magnadiva per i purec” outa ai students e en colaborazion con l’Operazion Mato Grosso e con l grop miscionarie Freinademetz de Poza e Pera.

A la scomenzadiva l’à tout pèrt duta la scoles de Fascia, da Moena fin a Cianacei, populères, mesènes e licei, con la colaborazion de n muie de ensegnanc che se à tout a cher l projet.

L’é stat na bona responeta da man di scolees, soraldut de chi più picoi e en dut l’é stat tout sù 16 quintai e 20 kg de magnadiva: pasta, ris, farina, zucher e da magnèr te bossol desche elech, cèrn, ton, pomidor e cousoi de vigni sort.

Tel liceo, se à fat na pìcola garejèda de solidarietà anter la classes, da la pruma a la quinta. L'an de scola che à portà più che duc l'é stat la pruma.

Duta la magnadiva la é stata portèda te oratorie de Poza, pesèda e metuda te scatoles dal grop Freinademetz e la vegnarà portèda a Genova olache la partirà i prumes de mèrz con n container con ite amò de autra magnadiva touta sù te autra pèrts del Trentin e de la Tèlia da l'Operazion Mato Grosso. La destinazion de la magnadiva l'é la miscions OMG del Perù.

“N gran rengraziament – i à dit i organisadores – l va a chi che à portà e a chi che à sostegnù la scomenzadiva. Te scola se varda de sensibilisar i bec e le familie al didament de chi che à de manco. L'é bel l far tras la scola, percheche se rua a dute le familie e ence i bec i à na part ativa, percheche i cogn portar enstesc la magnadiva a scola. L'é l terzo an che se fasc la regoeta de magnadiva. L'an passà l'era stat tout sù mingol de più. N auter an se cognarà vardar de far maor sensibilisazion te le clas, acioche se rue a aer n resultat amò mior”.