Vich muda viabilità

Data

14 de merz 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Va en doura doman, jebia ai 15 de mèrz, la neva ordenanza sotescrita dal Comissarie del Comun de Sèn Jan che despon endò un soul sens de circolazion.
Anter i provedimenc de maor emportanza dezidui dal Comissarie straordenèr del Comun de Sèn Jan, Antonio Arman, l’é segur l’ordenanza nr 6 del 2018, che ordena con i 15 de mèrz de meter en doura l sens unich de circolazion te dut l zenter del paìsc, da sunsom Strada Rezia a Piaz de Vich e l toch de Strèda Roma. Coi 15 de mé dapò, canche sarà l met de fèr la segnaletica orisontala, vegnarà segnà ence la corsìa resservèda a chi che va a pe o con la roda.

L Comissarie Arman ne à spiegà la rejons de chesta dezijion.

“Me é troà a cogner comedèr sobito la viabilità de Vich - l’à dit - ajache per la seconda outa siane sot a n recors portà inant dai hotelieres, che i volea n senso unich per la segureza de la jent. L prum recors, che l Comun aessa perdù, no l’era jit inant ajache l’ombolt Rizzi, enceben che l’aea tegnù la viabilità coche l volea, l’aea mudà vèlch, e a chesta vida l recors no aea più valuta. N’é stat fat na seconda che l’à abù n parer pesoch da man del Minister di Trasporc, che l’à dit che la viabilità en doura era pericolousa. Chest volea dir che l Comun aessa fat burta fegura, l’aessa abù speises e soraldut che se fossa sozedù vèlch, con chest parer negatif, l Comun fossa stat responsàbol e peisse che con chest chèder no assane podù dormir sorì. Coscita é domanà sobit l parer di Polins e ence de l’APT, che i se à dit a una per mudèr.

Cogne dir che me é fat gran marevea che la viabilità de n paìsc posse doventèr n tem da campagna litèla e che sun na costion desche chesta n Ombolt posse adertura venjer la litazions. No se trata de projec per l davegnir, ma de biota viabilità, e chesta l’é na costion tecnica, no politica. Ben segur ence ades zachei sarà a una e zachei de etres enveze no, ma la costion va veduda a livel generèl de segureza.”

Na ordenanza che fazile no ge farà piajer a l’ombolt Leopoldo Rizzi. “El l’arà abù sia rejons - disc smò l Comissarie Arman - e ben segur l defen sia sceltes, ma un che vegn da fora e l vèrda duta la costion e i pareres e l met dant la segureza di sentadins, peisse che no l’aessa podù fèr autramenter. Amò apede gé peisse che n bel paìsc desche Vich che l vif de turism l cogn esser vivù a na vida chieta, e l’é chel che chier ence l ghest.”

De chest e de etres provedimenc touc te chisc meisc dal Comissarie straordenèr del Comun de Sèn Jan rejonon sul numer de La Usc stampèda che vegn fora en vender ai 16 de mèrz.

 (Lucia Gross)