L’èrt de la femenes

Data

14 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’esposizion coletiva endrezèda da la sociazion “La Voce delle Donne” é da poder veder te sala de Consei de Soraga fin ai 15 de aost.

L’èrt é femena e la se palesa te na sujestiva esposizion coletiva inaugurèda en mercol al prum de aost te sala de Consei de Comun de Soraga, per endrez de la sociazion “La Voce delle Donne” de Fascia e Fiem. N bel grop de 17 artistes de la doi valèdes, e ence da lesc vejins, à metù fora sia operes te la mostra “ARTèDonna”: sensibilitèdes e tecniches desferentes che se mesceida te n viac che ispira sentimenc, marevea e curiosità.

Te la esposizion se pel veder chèdres fac con desvalives materièi, raprejentazions de paesajes, de fegures de femenes, de momenc particolères, ma ence fotografìes e operes fates col legn e col fer. Ogne artista à volù meter fora vèlch toch de sia colezion personèla, chel che più ge sà bel, o chel che più la raprejenta. La sala de Consei de Comun de Soraga l’é doventà n percors espositif che mena l vijitador a cognoscer e aprijièr i talenc feminii de noscia valèdes, tant chi che se à formà col temp, chi che se à afinà con la scola.

La mostra é stata averta con la prejentazion de Ilaria Chiocchetti che à spiegà che la sociazion “La Voce delle Donne” vel ge dèr ousc a la femenes e valorisèr si talenc. Chesta esposizion vegn endrezèda doi outes a l’an e ogne an se jonta apede vèlch artista neva. Chest an la mostra é stata metuda fora dant te la Sala Resa del Comun de Pardac e ades la é ruèda a Soraga, e chiò se pel la veder enscin ai 15 de aost. La esposizion é averta da les 5 a les 7 domesdì.

Na banca checena contra la violenza

Chi che à l’eie ascort segur à vedù che te piaz de Festil de Soraga, anter l’autra banches metudes fora, n’é ence una checena. No l’é stat per na pissèda mata de n pitor, l’é stat per volontà de l’aministrazion de Comun de Soraga. Na banca depenta de checen per dèr n segnèl, per la sensibilisazion contra la violenza su la eles e la promozion de la oportunitèdes pervalives.

“Aon volù ence noi far na banca checena – à dit l’ombolt Devi Brunel – per sensibilisar la jent contra la violenza su le femene, ma no ge aon scrit su nia, percheche no volon che la jent ge scrive su autre frasi, chi che sà che che vel dir, capesc pa ben nosce intenzion.” Segur n bel segn che desmostra la sensibilità de chi che l’à volù. 

De più su La Usc stampèda en vender ai 10 de aost 2018. 

 (Monica Cigolla)