Comun general: n guant che rejona de Fascia

Data

22 de setember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’artist Claus Soraperra à prejentà l depent realisà con si penìe su na facèda de la istituzion fascèna. N percors de idees dut da lejer e descorir

Ge dèr n sens identitèr al Comun general de Fascia. Chest l’é stat l pont primarie che à spent i raprejentanc de l’istituzion politica a ge comiscionèr l’opera a l’artist Claus Soraperra.

De gra al projet comiscionà dal Comun general, e a la geniala man de l’artist Claus Soraperra, ades sul parei aló da l’usc maester de la cèsa se pel mirèr n depent che conta la val de Fascia. N projet da slarièr, uzan endò fora na tradizion veiora de depenc e pitores che é stata scialdi de nonzech te noscia val, soraldut anchecondì te n temp de omologazion che volessa ne fèr duc medemi, metan a risech noscia cultura e identità.

Enstadì l’artist l’à volù ne prejentèr sia opera, per despieghèr delvers chel che el à volù meter ite te sie depent, enceben che dapodò vigniun posse l lejer aldò de sia esperienza. Na comunicazion donca, che nasc da chela fegures depentes che conta de Fascia ai fascegn e ai ghesć.

“L depent é stat spartì aldò de la facèda te cater moments” ne à contà Claus. “L prum a man cencia raprejenta la protostoria, la lejendes, e per chest l’é sbiadì, con na saturazion bassa ajache aon pecia documentazion storica e archeologica. La seconda pèrt é dedichèda al lurier e i colores se arvejina de più a la realtà. La terza é leèda ai simboi e coscita ence l color enstes doenta simbol. Tinultima, tel quarto moment é metù l color desche emozion, perché cree che l’ultima raprejentazion abie a che fèr con chel che sion inchecondì: la jent no lec la realtà del moment con razionalità, se tol posizion soraldut con l’emozion e donca é metù colores no razionèi”.

Claus Soraperra à volù amò rengrazièr l Comun general per ge aer dat l met, tant da pitor che da sentadin, de poder meter chest depent sul parei de la istituzion fascèna. N depent de valuta per tegnir auta la tradizion, la istoria e la cultura fascèna. Père Frumenzio ne à ensegnà che “N popul zenza istoria e zenza memoria l’é n popul zenza davegnir”. Fascia à sia storia, ge vel demò la chierir e da chest depent se pel tachèr, tachèr a “lejer la istoria per scriver l davegnir”.
 

De più su la Usc 37 stampèda ai 21 de setember

 (Daniele Verra)