Festa del Rengraziament: l ladin te fana

Data

11 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 14 de otober l’é la tradizionèla Festa del Rengraziament, chest an l recognosciment jirà a la Sociazion Cheghes de Fascia

Apuntament tradizionèl de l’Union di Ladins de la seconda domenia de otober l’é la Festa del Rengraziament canche duc i fascegn se troa per sporjer sie rengraziament al Segnoredio per i dons abui via per l’an. An dò an l’Union di Ladins te chesta ocajion la vel ge sporjer sie develpai a zachei che fèsc perpeèr de bogn fruc te noscia comunanza. Chest an l recognosciment jirà a la Sociazion Cheghes de Fascia che regoi presciapech 150 chef fascegn, vidèda dal president Ferruccio Tomasi.

La cojina de noscia tradizion fascèna l’é na cojina pureta, nesc veies durèa i prodoc che ge dajea la tera. Tel temp la cojina é doventèda più rica, l’à abù sia evoluzion de gra ai cheghes fascegn che à proà a mescedèr i ingredienc scempies e naturèi del post con chi de autra tradizions e autra cojines, sperimentan e vardan de stèr al pas coi tempes. La tradizions, la cultura e l lengaz ladin passa ben segur ence très l magnèr e i cheghes à per chest na gran responsabilità te l’esser bogn de restèr leé a noscia reijes e saer tel medemo temp les valorisèr te la vida de cojinèr e prejentèr i piac.

Chisc sarà ence i argoment de la meisa torona che vegnarà endrezà en domenia ai 14 de otober da les 15.00 al PalaDolomites de Ciampestrin.

La Festa del Rengraziament taca ite aboncont jà da doman: entorn les 9 se se troa te piaz de Ciampedel per dapò jir en defilèda fin sun gejia olache da les 9.30 don Luigi Trottner disc messa grana compagnèda dal Cor de gejia de Ciampedel.

Dò messa tedant gejia la Musega Auta Fascia sonarà vèlch toch e sarà i descorsc de l’autoritèdes.

Domesdì, belapontin da les 15.00, sarà l moment del confront e del debatit con la meisa torona “L ladin te fana”. Te chesta ocajion l’Union di Ladins ge sporjarà ai cheghes de Fascia n pìcol recognosciment per chel che i fèsc, te sie ciamp, per tegnir vives e gaertes noscia tradizions ladines. 

 ((mci))