Ladin e teater: l’é tacà la rassegna!

Data

08 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Enstadì l’é stat metù sun paladina, en colaborazion co la Scola, l prum spetacol dal tìtol “La Storia del Sudà”. Doman e domenia “INOUT TEAnTER” portarà dant “L circo di talenc”.

Gran aprijiament à ciapà endodanef “La Storia del Sudà”: instouta, aboncont, te n’autra ocajion, chela de la rassegna de teater metuda a jir dal Comun general de Fascia. Defat, la pruma outa che chesta opera la é stata metuda sun paladina l’é stat fora per l’uton passà per i studenc di licees de la Scola Ladina de Fascia. “I batadoes de bron”, l’inom che la compagnìa se à dat, l’à soscedà da nef gran emozions te vigni spetador.

Se à destudà la lumes e, co la paroles de Vigile Iori, l’é tacà l spetacol. Dant da dut, l’à prejentà sorafora con scempia paroles la storia de chesta comedia. L titol originèl l’é “L’Histoire du Soldat” e la é stata componuda dal rus Igor Stravinskij del 1918 sul test franzous de Charles-Ferdinand Ramuz che l l’à touta cà da na contìa tradizionèla russa. Chesta patofia la conta de n sudà, veteran di ciampes de batalia. Na dì, no tant bela de segur, l se scontra con l Malan: con el, l fèsc n pat e l barata sia ènema, raprejentèda da na pìcola vidola. Chest pat l se svilupea fora per la raprejentazion e n muie l’é tant la desgrazies che la sodesfazions che l sudà arjonc. “Rich de fora, ma mort anter i vives”: chest l’é l pensier culminant de chesta comedìa. L sudà l se sent envidià da duc, aboncont però te el no l’é più chela felizità che n’outa l’aea. Defora, de gra al didament del Malan, l’à dut, ma ge mencia la roba più bela, zachei che ge volesse ben. Duta chesta aventures les é contèdes da na ousc esterna, fincanche l pat anter Malan e Sudà fenesc co l’aparizion de na prinzessa: chest porta a n final muie curious e no spetà. L test, adatà te nosc lengaz dal gherdener e badiot da Vigile Iori col didament de la Scola Ladina de Fascia e de l’Istitut Cultural Ladin, l desmostra amò n’outa sia flessibilità: l ladin te chest ciamp l vadagna l ritm musical compagnà da l’orchestra e l’é n strument de teater per trasmeter amò de più la emozions ai spetadores.

Doman, vender ai 9 de november h. 20.30 te Oratorie de Poza, e en domenia ai 11 de november h. 15.30 a La Gran Ciasa de Soraga tel chèder de la rassegna de teater del Comun general de Fascia se pel veder l spetacol de “INOUT TEAnTER” che portarà dant “L circo di talenc”.

Lejé l’articol entriech su la Usc nr 44 che vegnarà fora ai 9 de november

 (Nicoletta Riz )