Canche te na cèsa om e femena é duc doi volontadives

Data

08 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Letizia Soldà da Poza, ensema a sie om Max Strada, i é duc doi Studafech. Ge aon domanà coche la é jita endèna chesta emergenza.

”Letizia co éla jita la setemèna passèda?

“Gio son jita fora en lunesc sera e son ruada deretorn a ciasa en martesc sera, é fat doi ore de cambie. Sion ponté demez con la seletiva per la meta te la Mont de Poza, dapò aon tacà a jir te le ciase per ge dir a la jent che no vegne durà la corente e dapodò sion jic a vardar e tegnir sot control i ruves. Autre squadre le é jite a taar i albres olache i era crodé.”

Te chisc caji na femena vegnela sparagnèda o cognela fèr che che fèsc i omegn?

“Na femena la va olache va i autres, ence a taar i albres se l’é de besegn. No i ne sparagna nia, ma l’é ence giust.”

Él stat momenc che te ès abù tema?

“Ei, en lunesc sera siane de cinch te la Mont de Poza per jir a veder de la meta. Endana che eraane te Saùch e aon empeà sù la lum, se à destacà la seconda meta e la é vegnuda ju proprio olache eraane, tant apede che aon cognù sciampar, se aon spostà giusta en temp, senó la ne aessa metù sot. Aane duc le ame che tremaa da la paura.”

Canche om e femena é duc doi studafech, che sozedel?

“Canche partion sion te doi squadre spartide e donca no se vedon. Chesta uta no podaane nience se sentir e sion stac mingol col pensier, speraane de se veder te caserma da sera. En martesc sera gio ere segura che l sie amò fora, enveze el l’era jà a ciasa e gio é spetà te caserma fin tart. No l’é semper sorì.”

Che te èla dit la jent de paìsc?

“Noi se n ascorjon de cotant che i studafech i é benvolui percheche l’é semper chi che se cruzia de ne portar na brioche o n té, te caserma aane n muie de roba da magnar portada da la jent de dut l paìsc. Cheste robe le fasc piajer percheche canche tu es fora da trei ore sot la sdravia a vardar n ruf, se rua valgugn con n té ciaut l’é n picol segn che te sciauda l cher più che l stomech. L’é n muie de solidarietà, la jent la capesc e la aprijia che che fajon e chest l’é l rengraziament più gran che se pel aer.”

 ((mci))