Ezio Anesi, 25 egn dò

Data

09 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ve meton dant la reflescion de Fabio Chiocchetti del Goti, da poder lejer ence su la Usc nr 44

“Se à destudà na steila lumenousa”. Coscita titolèa l bolatin de l’UAL vaan la mort subitousa de Ezio Anesi, stata ai 9 de november del 1993. Dò 25 egn da chela burta net, giusta te chisc tempes senestres olache somea che ence la steila de l’UAL sie destinèda a sfiorir, fosc dò na nìgola, fosc dò via l Saslench per semper, a n dir de “la Ziriola”, aon l doer de recordèr chest om che à dat la vita per sia tera e per si ideai.

Enlouta Ezio l’era ombòlt de Cianacei e senator de la Republica, no l’aea negun besegn de tòr pèrt ence a chela litazions, no l’aea negun besegn de fèr cariera: l’aessa cognù dut un renunzièr al scagn a Roma, se l fossa ruà ite te Consei provinzial. Ma per Ezio Anesi politica volea dir “servije”, volea dir se meter a la leta de la comunanza, no “fèr cariera politica”. Enlouta per ruèr a Trent no bastèa 600 stimes binèdes sù chiò dintorn, ge volea meter ensema la maor pèrt di litadores de Fascia e amò apede jir a se vadagnèr la preferenzes stroz per duta la provinzia, dessema col partit cernù per la cordanza, olache la maor pèrt di candidac l’era “concorenc”, se no aversaries, più che amisc.

Ezio aea jà abù problemes al cher, amisc e dotores ge aea desconseà de se candidèr; ma l saea inout che demò el l’aessa abù l met de regoer fora per l Trentin – olache l’era cognosciù e l’aea ence parenc e amisc – chela prefererenzes che podea ge dèr l met ai ladins de Fascia de aer amò n’outa na raprejentanza te la istituzions de l’Autonomìa.

Emben, l’é stat apontin dò na campagna litèla sfadiousa e grieva, diesc dis dant da la litazions, dò l’ultim stragauz de n comizie fat fora per Piné che l’é sozedù la desgrazia.

Enlouta parea che fossa dut fenì, che se aessa desfantà per semper n insomech, chel insomech envià via diesc egn dant co la litazions del 1983, canche per l pruma outa Fascia aea manà a Trent n Conseier ladin. Enveze l sacrifize de Ezio Anesi à orì la strèda a na neva generazion de militanc e na neva sajon de batalies e de arjontes, che te curt temp à realisà (beleche) duc i obietives de chel program politich, na lingia de provedimenc e garanzìes che ge arsegura a la mendranza ladina de poder se rejer enstessa, n sistem giuridich de auto-tutela che anchecondì tropes ge invidia.

Ades dut é mudà, dut va debel, l’é tempes de “memoria curta”: i veies desmentia e i joegn no sà. L pèr che dut sie vegnù ju per ciamin; l’é vegnù de moda ge trèr ados a l’UAL duta la magagnes del mond, magari ence “le scie chimiche”, e la politica desche servije somea da pez fora de cors. Per chest aon duc l doer de la recordanza: per jir inant, per tegnir poz, speran te tempes miores. Detalpai Ezio.

 (Fabio Chiocchetti)