La Usc di Ladins

Te Sëlva iel dan rëjes de dlieja tacà su chiche ie mort ti ultimi dis. N spavënt. Dan diesc dis n fòvel sies, n mierculdi da marënda ai 25 de merz fòvel bele undesc anunzies da mort tachedes su. N dumënia ai 29 de merz n iel catordesc, canche una ie ntant unida tëuta demez, ajache l mort ie unì suplì, sambën mé tl pitl cërtl de chëi de familia, do che l ie mort, da sëul, te spedel: chësc ie n auter aspet negatif dla situazion, che n ne possa suvënz niancanó tò cumià. Sun la tofla dan rëjes dla dlieja de Sëlva màncel mo almanco una na anunzia de n cunzitadin de Sëlva mort n sada ai 28 de merz. "Almanco un", ajache da di a di se slongia la lista. La cumenanza ntiera ie tucheda dassënn.

L semea che te Gherdëina vën la piza dla nfezions dant, l semea monce che la ie bele unida arjonta. La mëssëssa jì tosc juvier cun la cumpëida dla nfezions, te Gherdëina. Danz che la cumpëida de chiche ie efetivamënter testà positif resterà mo medema o la jirà mo n mumënt suvier, per n valgun dis, y danz che la cumpëida di morc jirà mo suvier, ma speron bën nia massa giut.

Chësta nutizia uel dantaldut dé da lecurdé tan priculëus che l coronavirus ie, che messon!!! resté a cësa!!! Nce sce l ne n’ie nia saurì, ma l ie mpo n pitl sforz, cun na gran fazion.

Da pert nce de duc i letëures de La Usc di Ladins ti va la cundulianzes plu sentides ai siei de familia. Che i pausse tla pesc de Die!

David Lardschneider

Foto: La anunzies de mort dan rëjes dla dlieja de Sëlva.