La mëssa sun Whatsapp

Data

29 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chëst'enes nia saurides nes à mustrà che truepa cosses cun chëles che fan usei te na cërta maniera ne va śën nia plu, y nscila iel chiche se lascia per fertuna tumé ite velch de nuef. Chësc vel nce per la dlieja.

Sn. Digan Vijo Pitscheider liej uni di na mëssa, coche da tradizion y regula per uni preve, ma zënza jënt te dlieja. Ma mpo sàl che si mësses y dantaldut si bela perdiches ti ruva permez ala jënt, tres l radio dla pluania, che n possa bele audì da plu ani incà sun la frecuënza de 100,5 MHz. Y da puecia enes incà nce te na maniera plu moderna, tres Whatsapp.
 
L’idea ie dl mëune Alfred Obletter
L’idea ie de Alfred Obletter, che ie bele da 26 ani incà mëune tla dlieja de San Durich a Urtijëi. Te chësta situazion scialdi ria y ncompra, cun la jënt tacheda a cësa, se à l mëune pensà de mëter a jì, de si bona, chësc servisc: "É metù su na grupa Whatsapp dal inuem "Plata de Pluania" y é scumencià a meter leprò duc chëi che ova nteres, chëi che ratove che i fossa cuntënc de giapé vel’ nfurmazion," dij Alfred Obletter, njuntan: "Coche la ie mefun, un ti l dij al auter, y nscila ie chësta grupa prësc chersciuda."

Messaje Whatsapp al numer 328 3638856
Duc chëi che à nteres possa cherdé su o scrì nmessaje Whatsapp alnumer 328 3638856 , pona vëniel riesc juntà pro tla grupa. Obletter: "Puech do che la funzion ie fineda mëti su sun chësta grupa Whatsapp nce l audiofile dla mëssa, dl vedlé y n.i., y uniun possa nscila se scuté su chëstes, canche l à dl’aurela, canche la ti va ora miec. Nce chiche ne sta nia a Urtijëi se à bele lascià scrì su, ajache ëi ne possa nia audì nosc radio de Pluania," nscila l mëune dla dlieja de San Durich.

L nvit a fé pea tla grupa Whatsapp vel per Gherdëina, ma sambën nce per duta la valedes ladines: coche dit, l tleca mandé n messaje Whatsapp al numer 328 3638856, nia de plu scëmpl.

Simon Peter Moroder

FOTO: L mëune Alfred Obletter se cruzia de mandé inant la Plata de Pluania y la mësses tëutes su per audiofile tres Whatsapp.