La Usc di Ladins

Che fove na tel mëndra muta ovi da mat legrëza canche mami tulova ora de si castl na tel pitla scatula de carton brum linëus cun zandl ntëurvia. Laite òvela n grumon de tel bela santes che la giapova da pitla da si nona, dala andes o nce da si oma coche lecort.

Danterite n fòvel de beliscimes da zandl culëur or o nce mé blanch cun motifs religëusc. Y pona fova la santes - o miec zedules - dla Pista da Pasca fates ite psunder te papier de sëida, che mami teniva dassënn cont de les avëi, bel cuncedes ite ann per ann da canche la fova jita a si Prima Santa Cumenion. Chëstes ne daussòven pa danz no tan tenì tla man y bën gordenó urté a les zaré. La santes dla Pista da Pasca ova n gran valor.

Ma percie tenìven pa tan cont de avëi na santa dla Pista da Pasca? Curiusan mpue’ te internet sons unida sëura. Canche Martin Luhter ova su per i dejeneies dl 1500 metù n droa na gran Reforma tla Dlieja Cristiana, ulache truepa jënt ova pona scumencià a ti jì do a si ideies, ova la Dlieja romana-catolica inò cialà de tré ite chël che la perdova bel plan. Nsci fòvel unit a s’l dé na Contrareforma, o sce n uel dì inuvazions da pert dla Dlieja romana-catolica per ti sté permez dantaldut al Prutestantejim che se slargiova ora for plu y plu. Danter l auter unìven ubliei a jì almanco un n iede al ann a pista, y chësc da Pasca. Per avëi l cuntrol sce la jënt jiva o no a pista òven scumencià a dé ora zedules da Pasca.

Uni ann dajòven ora d’autra zedules cun lessù l inuem dl luech y l ann. Nscila pudòven cumpedé tanc che fova jic a pista, pudan mustré su tanc che teniva dala Dlieja romana-catolica. Y davia che l preve ova da jì a pisté te plu luesc, òven nce metù su dis aposta ntan l’Ena Santa per jì a pista. Fanc y fanceles giapova ntlëuta mez n di liede per ti jì dò a chësc duvier, y ova pona da lascé udëi a si patron la santa dla Pista da Pasca che i ova giapà. Nce i sculeies messova ti mustré al maester o ala maestra la santes da pista.

L articul ntier sarà da liejer tla edizion stampeda di 10 de auril.

Marta Senoner

Foto: Na santa dl 1954, a culëures.