Dolomitale: ntan chësc fin dl’ena iel l gran Filmfestival a Urtijëi

Data

07 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N juebia iel l prim film dl bel festival de films  www.dolomitale.com a Urtijëi. L va inant nchin a n dumënia ai 11 de nuvëmber. Nuzëve dl’ucajion de udëi de biei films!

Dolomitale - Doi de gran fans dl Filmfestival ie l ambolt de Urtijëi Tobia Moroder y l assessëur per la cultura Ivan Senoner. Tlo si pensieres n con’ dla manifestazion culturela a Urtijëi: “Te Gherdëina vëniel bele da for incà metù a jì na gran cumpëida de scumenciadives y manifestazions cultureles d’uni sort: mostres d’ert de livel scialdi aut, cunzerc dla mujighes y di cores dla valeda, ma nce de grupes cunesciudes da oradecà. Leprò teatri, sëires de leteratura y mo truep d’auter. Cun chësta prima edizion dla „Dolomitale“ se arichësc chësc panorama culturel de na scumenciadiva nueva. Chësc festival, metù a jì dala Lia Mostra d’Ert - na lia che à, da si fundazion tl 1920 incà, for inò sapù da se giaurì a stredes nueves - ie dedicà a na forma d’ert do la rata mo puech cunesciuda te nosta valeda, l film, scebën che Gherdëina ie stata suvënz paladina per films de carater nternaziunel, dala produzions de Luis Trenker nchin al „Bal di Vampires“ de Polański tl ann 1967. Nce ti ultimi an an te Gherdëina, de gra a si cuntreda da marueia, tëut su plu films. Danter chisc nce tei cun atëures che à venciù l Oscar, coche Juliette Binoche. Perchël sons segures che i films che vën chisc dis mustrei pra l festival ie zënzauter nteressanc y de na bona cualità artistica. Speron de descedé l nteres dla jënt de Gherdëina, tan plu che iusta ti ultimi ani iel nce n valgun jëuni de nosta valeda che à abinà tl film na forma artistica per dé usc a si criatività, a si sensibltà estetica y a si ueia de cunté stories. Rengrazion la Lia Mostra d’Ert y l cuordinadëur de chësc proiet Lukas Pitscheider per avëi nvià via chësta scumenciadiva. Ti mbincion a duc chëi che à judà pea y a duc chëi che fej pea che l festival garate dut ntëur. Che chësta manifestazion sibe la prima de mo truepa edizions dla “Dolomitale”!” Nscila l ambolt de Urtijëi Tobia Moroder y l assessëur per la cultura Ivan Senoner.

L Südtirol tl zënter

Duc i films, sibe i plu lonc da ades doi ëura che nce i curc da vint secunc nchin vint menuc, arà coche tematica l Südtirol. Scialdi nteressant saràl dessegur nce a udëi coche l sarà l lëur de chiche ne n’ie nia da tlo. L sarà nce reghisseres fulesteries, che ti dajerà bonamënter duta n’autra nterpretazion a nosc raions. N bel mix de ideies y ponc de ududa.

L merit dla Lia Mostra d’Ert/Circolo

Dl’urganisazion y dla location se cruzia la Lia Mostra d’Ert de Urtijëi. Per l’ucajion uniràl metù ora nchin a 120 stuei te si sala. Chësta sarà dessegur na bela esperienza per la Lia de bën 98 ani. N gran merit per la manifestazion ie da ti dé ai doi cumëmbri dla Lia Lukas Pitscheider y Milena Holzknecht. Lukas Pitscheider à studià jurnalism y media nueves a Viena, ulache l lëura coche reghisser de documenteres. L sarà l cuordinadëur dla manifestazion. Milena lëura bele da cater ani incà pra linges de documenteres a livel nternaziunel. La à studià tla scola de films documenteres Zelig a Bulsan, ulache la nsënia al didancuei.

Prinoth cun l prim film

L festival vën naugurà n juebia ai 8 de nuvëmber, cun l film “Die fünfte Himmelsrichtung” dl reghisser de Gherdëina Martin Prinoth. Si film documenter conta de n pitl mut tëut su de Urtijëi che ti va do a si ravises brasilianes. Tl film vëniel rujenà tudësch, portughes y sambën ladin, dut cun sottituli per nglëisc.

L  program

Do la giaurida de juebia, vàla inant cun i autri films, duc per tudësch, talian o nglëisc, cun sottituli canche l ie vel’autra rujeneda coche l spanuel, finich o ucrain. N vënderdi ai 9 de nuvëmber dala 8.00 iel l film “Amelie rennt” de Tobias Wiemann y Natja Brunckhorst, dala 10.15 l film “Die Einsiedler” de Ronny Trocker, dala 14.00 i doi films “Roads” de Erald Dika y “Morgen, Kinder, wird’s was geben” de Martin Telser, dala 17.00 l film “Der sechste Kontinent” de Andreas Pichler, dala 19.00 l film “Life in Four Elements” dla reghissera cunesciuda dl’Austria Natalie Halla, dala 21.00 “The nest of the turtledove” dl ucrain Taras Tkachenko.

N sada ai 10 de nuvëmber iel da udëi dala 16.00 inant i films curc che dura da cin’ nchin a vint menuc: “Integra”y “Stato di Gloria” de Matteo Vegetti, “Der Gesichtensammler” de Lisa Maria Kerschbaumer, “An eëotic space” de Daniel Fill, “Zuflucht” de Daniel Andrew Wunderer, “Short Cuts from a Town” de Thomas Perathoner, “La tana” de Alessio Vasarin, “Der Wolf” de Benjamin Thum. Chisc films vën valutei da publich y da na iuria te na categuria a pert, la premiazion ie duman sada dala 20.00. Leprò saràl dala 18.00 l film „Funne – Le ragazze che sognavano il mare“ de Katia Bernardi dala 20.30 l film “Überall wo wir sind” de Veronika Kaserer.

N dumënia ai 11 de nuvëmber iel da udëi dala 14.00 l film “König Laurin” de Matthias Lang, dala 16.30 “Mister Universo” de Tizza Covi, dala 18.15 “Wonderful Losers” de Arunas Matelis, dala 20.00 iel inò l mesun de udëi “Die Einsiedler” de Ronny Trocker.

Masterclass

Pra la masterclass n sada ai 10 de nuvëmber dala 14.00 rujenerà la produzënta de films cunesciuda Nathalie Halla dl’Austria. Ëila cunterà de si vita coche produtëura ndependënta de films y de coche l vën a s’l dé n film per l chino. La piterà nce na udleda do la cultrines de si film nuef „Life in four Elements“.

Party, brunch y Museum

Cun la cherta dl festival iel l mesun de jì debant tl Museum de Gherdëina n vënderdi ai 9 de nuvëmber 10.00-12.00 y 14.00-17.00. N sada dala 10.00 inant iel tl „Saut“ l Filmbrunch, cun l mesun de rujené cun reghisseres, produtëures, autores y n generel cun nteressei ntan che n se bev n bon café o té, cun brioches frësces y mujiga dal vif. N sada sëira iel la gran party cun i Madax, dala 22.00 inant: n inuem, na garanzia!

Ma dut ntëur se pàiel a se tò dl’aurela y liede, massa bel ie l program de chësc fin dl’ena de films y manifestazions ntëurvia: l se merita na „full immersion“ de trëi dis! Plu avisa: www.dolomitale.com. (usc)

Foto:

I Madax tiza ite pra la gran party de n sada sëira ai 10 de nuvëmber tl Saut a Urtijëi, sun Plaza de Sant Antone.