La Usc di Ladins

Chësta é la pröma Edema Santa che i fedei ne podará nia festejé deboriada te dlijia. Te chëstes edemes de "coronavirus" él tröpes ploanies che se dëida fora cun le Radio dla Cöra, olache al vëgn trasmetü mësses y funziuns. Insciö sarára ince tl’Edema Santa, olache le belorí chësta domënia y i cësć dl signé la domënia de Pasca gnará benedis por n iade a ciasa, tres le radio. Chësc n’ó sambëgn nia dí che al basta lascé la spëisa te frescara. La jënt é inviada da arjigné i jops d’orí, sciöche ince i cësć dl signé, y da i mëte sön mësa de ciasadafüch o de stüa, por ciafé la benedisciun tratan che an ascuta la Santa Mëssa.
Tla Val Badia arán iniann ince n’atra novité, deache al sará la pröma edema santa che jará "en ona" ince en live streaming – ó dí che an les odará te internet. Al é la Ploania de Badia che fej chësc vare, sciöche le Degan siur Iaco Willeit â bele anunzié dan trëi edemes t’La Usc di Ladins. Plü avisa gnará les mësses y funziuns trasmetüdes sön le profil Facebook dl Grup Decanal www.facebook.com/grupdecanal
Al sará da odëi la mëssa dla Domënia dl orí dales 10:00, spo la zelebraziun cun ora de adoraziun en Jöbia Santa dales 20:00, la liturgia dl Vëndres Sanc dales 15:00, la zelebraziun dla Sabeda Santa dales 20:00 y en Pasca ai 12 de forá la gran mëssa dales 10:00 y na funziun da Pasca dales 15:00.
La Dlijia se lasciará ince aldí ti paisc cun les ciampanes. Ares sonará adöm por 10 menüc ince en Jöbia Santa dales 18:00, en Sabeda Santa dales 22:00 y la Domënia de Pasca dales 12:00.  (pablo)