La Usc di Ladins

La Maratona nr. 34 ê preodüda por la domënia ai 5 de messé 2020, dedicada al tema dl’ert, mo ara ne gnará nia fata. Le Comité d’Organisaziun á tut la dezijiun da desdí iniann l’evënt, por gauja dla situaziun che düc conesciun. Na dezijiun dessigü nia saurida. "La Maratona é na festa, na festa söla roda, na festa de porsones che á ion la roda y che vëgn da döt le monn por s’incunté tl cör dles Dolomites Patrimone Mondial UNESCO" - lion te n comunicat mené fora da Alta Badia Brand - "Al n’ó nia ester tröp por splighé che chësc n’é nia le momënt por fá festa. Al é n momënt rî por düc. Sëgn él le momënt por nes daidé düc deboriada, nes fá coraje l’un cun l’ater. L’ater ann orunse che al sides n momënt fantastich, por düc nos." La Maratona é insciö sburlada ai 4 de messé 2021.
Le Comité scrí inant che "i iscric che á bele regolarisé por le 2020, ne mëss nia se sté cun fistide por l’iscriziun. Ara valará por le 2021." Düc i detais gnará comunicá sön le sít www.maratona.it

 (pablo)