Muciadus: Badia n’arjunj nia la maioranza por i partí sö

Data

10 de fauré 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La situaziun por l’assunziun de de pici grups de muciadus a livel de Val Badia se complichëia. I Consëis de Comun da San Martin, Badia y La Val ê cherdá le vëndres ai 10 de forá da lité sce tó pert al sistem SPRAR por tó sö n pice numer de muciadus. Degüna maioranza a Badia.
Cun le scê al sistem SPRAR dl Consëi de Comun de Mareo, pronunzié al 1. de forá, parôl che an foss rová n vare inant por na unité tla Val Badia. Les juntes da La Val, Badia y San Martin ê bele a öna da jí chësc tru, che preodô da tó sö n pice grup de muciadus te vigni comun (3,5 porsones por 1.000 abitanc). Indere, da na reuniun di ombolc êl gnü definí che vigni Consëi ess albü da se pronunzié tla chestiun. Mareo é sté le pröm che á dit de scê. Le vëndres ai 10 de forá êl le reuniuns de Consëi a San Martin de Tor, Badia y La Val.

A La Val án arjunt la dezjiun püch dan misdé, y sciöche an podô s’aspeté, él sté na maioranza a öna, cun trëi astenjiuns. Al ê pö sté La Val che ê pié ia cun la orenté da partí sö te düc i comuns, do che an á vit para les gran contrarietés por n maiú grup de 25 porsones. Atramënter éra jüda ti dui comuns vijins. 

BADIA DIJ DE NO

Le resultat plü eclatant é gnü a s’l dé tl Consëi Comunal de Badia. Do passa n’ora de discusciun, canche l’Ombolt Iaco Frenademetz á metü la proposta a litaziun, él ma sté 8 aconsiadus sön 17 che á dit de scê. Chël ó dí che na maioranza de 9 aconsiadus é stá cuntra l’adejiun al SPRAR. La discusciun é passada da n apel a umanité y responsabilité soziala, cina a tëmes, contrarietés y dübi, che á ala fin albü la suravënta sön la dezijiun. Por tröc aconsiadus êl scemplamënter ciamó massa domandes davertes por tó la dezijiun.

SAN MARTIN É A ÖNA: MO MA SCE DÜC FEJ PARA

Le resultat tl Consëi de Badia condizionëia indere ince la dezijiun tuta dal Consëi da San Martin. Ince iló él sté na discusciun plü lungia, ince iló êl cotan de domandes sön details, che aconsiadus y assessurs ess ion albü respostes plü tleres. Manco él gnü fora chiló aversciuns. Ala fin á le Consëi dit de scê al’unanimité (al ê 10 presënc), mo a condiziun che düc i comuns dla Val Badia fajess para. Do la dezijiun a Badia n’é chësc nia le cajo.

N decret ministerial dij che i comuns che tol pert al SPRAR, aladô dl contingënt dé dant (3,5 muciadus por 1.000 abitanc), vëgn stlüc fora da d’atres assegnaziuns provinziales y assegnaziuns de de majeri grups. Sce an ne tol nia pert al sistem SPRAR, spo romagnon ite tl contingënt che i un tla Provinzia de Balsan. Y sciöche an sá, ó la Provinzia mëte jö döt de gran grups de almanco 25 porsones tl medemo post. An odará sciöche ara jará inant.

T’La Usc di Ladins di 17 de forá ciafarëise n resocunt plü detalié sön les argomentaziuns y i intervënc aldis a San Martin y Badia.  (pablo)