Dess i ladins jí cun i schi sön Kronplatz?

Data

13 de fauré 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Val’ é sigü: i ladins ne pó nia scuté, canche sü inoms (che é por ater autentics y plü vedli co i todësc y taliagn) vëgn sburlá sön na pert, smendris o cinamai desgorc! I portun na documentaziun storich-scientifica sön l’inom „Plan de Corones“, speran che ara indespres na reflesciun y discusciun costrutiva.
Danfora la gauja y finalité de chësc tratat tl foliet ladin „La Usc di Ladins“: al ne dess nia fá polemiches, ma invié i responsabli di comuns, dles assoziaziuns turistiches y dl turism en general da se tó dlaurela da lí y s’informé adaldërt y (ince por ester a conescënza di fac te döt so svilup). Porsones che tol dezijiuns te val’ materia é competëntes, sce ares á nu la materia. Al é aldedaincö n plus sce i managers dl turism sá la storia di raiuns, dla jënt che vir y di lingac dla jënt. Degun manager turistich de nüsc raiuns ne dess savaié che chësc tratat ne l’interessëia nia – zënza desmostrel y dá pro che al ti an é anfat, sce al vëgn adoré al post di inoms di paisc todësc de Südtirol i inoms taliagn de Tolomei. I baiun de inoms de nüsc posć y de süa adoranza, ince tl marketing turistich y söles chertes turistiches; i baiun donca de nüsc inoms, chi che é liá a nosta storia y a nos - porchël ái ince na süa storia y sá da s’la cunté a nos.

Da plü agn incá mëna do, y mëna inant, le Skirama che tol ite les trëi perts dla munt (Mareo, Valdaora y Bornech) l’adoranza dl inom „Kronplatz“ lascian demez l’inom ladin, che vëgn adoré ince por talian, „Plan de Corones“. L’inom „Kronplatz“ y „Plan de Corones“ é ince deventé dan püc agn consorz turistich (laota â inom la regiun turistica „Crontour“), cun ala pert ince Al Plan de Mareo (y da dui agn incá ince San Martin y Antermëia). Scebëgn che al vëgn dant tl’informaziun dl consorz ciamó l’inom Plan de Corones, porta la plata internet ofiziala dl consorz l’inom su www.kronplatz.com; sce an dá ite www.plandecorones.com röion automaticamënter sön le domin todësch. Söla domanda a de chi d’Al Plan che á da dí la süa al intern dl Consorz turistich de Plan de Corones ciodí che ai ne s’á cina sëgn nia paré assá da lascé sferié demez plan plan daldöt l’inom ladin dal consorz turistich, diji che ai é ma „1 cuntra 2“ y che ai la perd vigni iade. Se tratera de chësc vers veramënter ma de na definiziun da trá dant a n’atra por retlam turistich, o él n inom, y fossel spo da tó en conscideraziun deplü aspec? Al é n inom che á sües raisc, y porchël él da analisé plü avisa deplü aspec.

Cun n inom se identifichëion, ajache n inom original sá da cunté val’: al é nasciü te chësta cultura de lingaz y é chersciü cun la jënt y sües ativités. I inoms ladins á en referimënt a contrades y carateristicheas de posć y laur, y n’é nia ma gnüs inventá sogan cun le bun sonn de vocai y l’aliteraziun. Co messass pa sëgn la jënt mareora y ladina se identifiché fora de n aiet cun la parora todëscia (scialdi „nöia“) Kronplatz? Y baian che nosta jënt che laora tl turism messass ester autentica da ti cunté al scior dla bela munt de Kronplatz! Sambëgn é gonot l’adoranza de n lingaz liada ince a emoziun y emotivité, mo ogetivamënter ne vara nia da adoré te n iade zënza bazilamënt n inom forest al post de chël de ciasa. Sce nosc fre é por nos Jan, se stentunse da ti dí teniade y por dagnora ma plü Johann. Vigni inom é ince identité, relaziun y nia ma na parora.

Deplü tl’ediziun stampada atuala de "La Usc di Ladins"!



 (Iaco Rigo)