50ejima sajun por l’implant de Piz La Ila

Data

15 de merz 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Al ê l’ann 1966, l’ann dles gran rogossies, che al gnô fat sö a La Ila le pröm implant de Piz La Ila. N implant che á stlüt le cërtl dl carussel dai schi danter Corvara y San Ciascian, y che á scrit para la storia dl paisc y dl’Alta Badia.
Al ê l’ann 1961 che le paisc da San Ciascian ciafâ so pröm lift de Piz Sorega. Cun chësc implant podô i schiadus jí iteissö sön le plateau, n vare che chi da Corvara â bele fat valgügn agn denant. Tla publicaziun che le Skicarosel Corvara á dé fora dl 1997, en gaujiun di 50 agn, scrí le pionier Erich Kostner insciö: ”Sëgn êl ince por chi da San Ciascian ora da se descedé y da ti dé la man ai pioniers dl setur turistich. Zoruch restâ ma chi da La Ila, che ti ciarâ a sü vijins cun gran invidia.”
Bel avisa insciö póra ester stada, deache La Ila, sciöche paisc plü zentral, ê le su che n’ê nia ciamó colié cun le plateau. Chësc sozedará bele püc agn dedô, l’ann 1966, canche al gnará realisé l’implant de Piz La Ila, y lapró i dui implanc ”Roby” y ”Bamby”, che i dará insciö veramënter vita al carusel danter Corvara, San Ciascian y La Ila, a n gran carusel dai schi. Da chël ann, o damí da chë sajun, él sëgn passé rodunt 50 agn. Un di protagonisć por la realisaziun dl implant de Piz La Ila - sambëgn dlungia le gran pionier di lifc Erich Kostner - é sté Sciandro Canins de Badia, cun chël che i un orü se recordé zoruch a chël ann, che ê pö ince sté l’ann dles rogossies. I nes un lascé cunté sciöche ara ê stada. Chësc ince deache rodunt chësta domënia ai 19 de merz gnarál metü da jí sön Piz La Ila na festa cun aorela cörta, mo al gnará ince metü fora na mostra cun retrac vedli sön la costruziun de n implant che á scrit la storia dl paisc, y che sorvësc öna dles pistes plü conesciüdes: la Gran Risa.

T’La Usc di Ladins di 17 de merz podarëise lí deplü sön la costruziun movimentada y la storia de chësc implant.  (pablo)