Omizid de Kurt Huber: arestada süa ex-fomena

Data

12 de mei 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I Carabiniers da Balsan á aresté Dzenana Mangafic por l’omizid de Kurt Huber. I details é gnüs comunicá te na conferënza stampa, stada ai 12 de ma a Balsan.
Le vëndres ai 12 de ma da doman mënâ fora i Carabiniers n comunicat stampa, olache al gnô dit che an â aresté l’assassin de Kurt Huber, l’ël de 71 agn d’Al Plan, ciafé mort ai 5 de dezëmber da doman te süa abitaziun a Rasun Dessot, olache al viô cun süa ex-fomena. Kurt dal Pech da Valiares ê gnü ciafé te n bagn de sanch, copé brutalmënter cun 8 ficiades de cortel ala punza. I recordun che Huber ê invalid; da canche al ti â zinchené le bot êl taché a n scagn da rodes y an â ince messü ti taié ia na iama.
Por chësc vëndres 12 de ma da misdé él sté tla Procura dla Republica da Balsan na conferënza stampa olache al é gnü comuniché i resultac dles inrescides portades inant te chisc ultims mëisc. Ince La Usc á orü ester söl post por documenté le svilup de chësc fat de sanch, che atoca ince la Val Badia.

Püch do les 12 êra tan inant che le procuradú Giancarlo Bramante y la scuadra dles forzes che á condüt les inrescides metô man da cunté details sön le sozedü. Bramante á splighé che al é gnü aresté la ex fomena de Kurt Huber, Dzenana Mangafic, originara da Sarajevo. Ëra ê bele atira tl pröm sospetada da avëi cometü le reat, mo al á orü ester chisc cin’ mëisc por ciafé na majera sigurté. Bramante á splighé che la mort de Huber vá zoruch ai 4 de dezëmber, tles prömes ores dla doman o al plü tert söl pröm danmisdé. Por ciafé fora l’assassin án danter l’ater interoghé bëgn 110 porsones. Mangafic é gnüda interogada trëi iadi. Sü alibi n’á cun le passé dl tëmp nia podü gní confermá: la ëra â danter l’ater dit che ara ess aldí n copl de pistola, ci che n’á nia podü gní confermé. Man man é i sospec de colpevolëza cuntra d’ëra gnüs tres plü spësc, ci che á spo ince condüt a so arest. Sön les gaujes dl omizid á Bramante ma splighé che al ê ti ultims tëmps plü gonot sté stritoc danter Huber y süa ex fomena, ci che lascia ponsé a n at de impuls, a n raptus che á condüt a chësc at estrem. La ëra é ince gnüda sotmetüda chësc de a n interogatore de garanzia, olache ara á anuzé so dërt da ne nia respogne. L’erma instëssa n’án nia ciamó ciafé. A vigni moda é les ficiades de cortel stades dër sotes y á tl tëmp de püc menüc porté ala mort de Huber.  (pablo)