La Ila: novités sön plaza de dlijia

Data

12 de messel 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La plaza de dlijia da La Ila é gnüda abelida cun n fistí dl artist Lois Anvidalfarei y valgügn banc originai.
L’ann passé ala fin de setëmber án fat gran festa a La Ila por i 500 agn dla dlijia. Te chësta ocajiun êl ince gnü benedí i laurs por la cortina nöia. Ci che manciâ ciamó, ê l’abelimënt dla plaza deforaia. Chësc é sëgn sozedü y da valgünes edemes incá pón odëi le resultat. Dan cortina de paisc él gnü inaudé amez jügn n fistí particolar, sciöche ince de bi banc da se senté.
Sodesfaziun por chisc laurs vëgn dal’assessuria de Comun Roberta Rinna Mellauner, che i é stada do al proiet y dij insciö: ”Chësta idea ê bele piada ia canche i un baié da fá la cortina. La Ila Alta é n post ciamó n pü’ chît tl paisc, y i osservun che n gröm de jënt dl post roda döt l’ann chiló sö, se fej n spazier, y i sciori vá ince gonot te cortina.”
Al edl dá zënzater le vistí, por chël che an á inciarié l’artist conesciü Lois Anvidalfarei de Badia. Ël baia de ”na ligrëza y n onur da podëi fá na opera te ciasa, a La Ila Alta - na belijia tla Val Badia”. Le vistí é formé da na gran pera scöra cun lassura n ël de brom cufé dan jö, cun le ce che azica l’ega chîta che rogor fora y demez.
Le fistí s’án ince lascé costé valch - finanzié dal Comun, dal’Assoziaziun Turistica y dala Consulta Ladina. Damané ân ince la Fraziun da La Ila, che á dit de nou. Le fistí instës fej süa parüda: sön na gran pera retangolara de chës cin’ tonelades él n ël cufé jö dan l’ega che rogor chîta - n referimënt al’umilté y ala meditaziun. Lapró él ince garaté de bi banc da se senté dër originai, na opera de Berto Crazzolara.

T’La Usc di Ladins di 14 de messé nes spligará Lois Anvidalfarei ci reflesciuns che stá do la opera ia y i podarëis ince lí deplü sön le ciodí che la Fraziun da La Ila n’á nia dé le contribut.  (pablo)