Gabi tëgn scora a ciasa!

Data

08 de november 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ince tla Val Badia él n valgügn geniturs che á tut la dezijiun da ti tigní scora ai mituns te ciasa. Öna é Gabi Mutschlechner d’Al Plan. Ara é uma y sëgn ince maestra de sü trëi mituns, che fajess pordërt düc n’atra classa. I sun jüs a la ciafé por la damané ciodí y co che ara i büta.
Ai pröms de setëmber á por n gröm de mitans y mituns indô metü man les scores: elementara, mesana, scora alta. Por n valgügn indere n’éra nia stada insciö, deache sü geniturs á tut la dezijiun da ti tigní scora a ciasa. Ince tla Val Badia él zacotan de caji de chël che an tlama tl jargon ”homeschooling” (scoraziun a ciasa). En sostanza él i geniturs che se tol sö da ti insigné a sü mituns les materies che gniss zënza insignades da na linia de maestres y maestri. Ince sce la scora vëgn tignida a ciasa, mëss i ejams gní dá jö deboriada cun i atri scolars, porchël él zënzater n vare che an mëss se ponsé sura bun.
Gabi Mutschlechner d’Al Plan é öna dles umes che á tut la dezijiun da insigné a ciasa. Sü trëi mituns á düc bele albü l’ocajiun da jí tla scora publica. Amos jiss iniann te pröma mesana, Alina te cuinta elementara y Lian te terza. Nos sun jüs a la ciafé, por la damané plü avisa co che la scora a ciasa funzionëia, sce al é sté ri da mëte man, co che n de ciara fora y ciünes che é stades les reaziuns.

La Usc: Gabi, ciodí aste pa tut la dezijiun da ti tigní scora ai mituns a ciasa?
Gabi Mutschlechner: I á tut la dezijiun da fá insciö, deache denant me savôl che i mituns messâ sté tan dî a scora. Cina che ai ê a ciasa êl la mesa dales 3 y dedô êl ciamó da fá i compic. Al me savô stressant. Iö n’â zacó plü degun momënt da sté cun ëi. I mituns ê stüfs da sté a d’ascuté sö zacai y orô soghé. Al me gnô imënt ch’i foss ma plü na te’ fancela, ch’i n’ess nia plü momënc da cherié chësc raport danter geniturs y möt, che é val’ de beliscim.

Ci t’aspeteste pa dal fat che te i insëgnes a ciasa? Ciodi dijeste pa: al é miú che iö i insëgni jö, plütosc co i mené a scora?
Dantadöt ciodiche iö ne i sforzi nia. Iö ne diji nia: te mësses fá chësc, mo te pos le fá. Le poch de patüc é gran, porchël ti lasci chirí fora danter plü cosses. Ai sá ince che ci ch’i fajun, unse baié y fat fora deboriada. Al é n laur de grup olache ince ëi á podü tó la dezijiun. Y ai sá ince che ai mëss s’impegné, che zënza ne vára nia.

Co éra pa stada por i mituns, él pö ince por ëi n gran cambiamënt, p.ej. che ai n’é nia plü cun i compagns?
La scora a ciasa é tres stada tema te nosta familia y iö ess pordërt bele orü le fá dal mëteman insö. I mituns l’á tuta sö dër bun. Ai é düc trëi stá a scora y conësc les dificoltés. Ai gnô gonot a ciasa cun les leghermes por gauja de coienaries, bronterades por nia y d’ater. Inscioma, patüc che iö n’aldi nia ion.

Chëstes y ciamó tröpes d’atres domandes, podarëise lí do tla intervista che i ciafëis t’La Usc di Ladins di 10 de novëmber 2017  (pablo)