Mareo ó ester lëde da lus y laurs

Data

14 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tla sentada dl Consëi Comunal de Mareo él gnü deliberé al’unanimité na detlaraziun che Mareo dess ester lëde da lus y laurs. Lapró á la fraziun d’La Pli n assessur nü.
En mercui ai 13 de dezëmber dales 5 domisdé él rové adöm le Consëi Comunal de Mareo. Un di punc prinzipai ê l’aprovaziun dl bilanz de previjiun 2018, pro chël che al n’é nia sté de majeres discusciuns. Al ordin dl de êl ince la müda dl assessur da La Pli. Bele dal mëteman dla legislatöra êl gnü fat fora che l’assessorat da La Pli foss gnü partí sö anter döes porsones. Richard Erlacher, che é dal 2005 incá sté assessur comunal de Mareo, á ciamó fat chësta mesa legislatöra, por i lascé da sëgn inant la lerch al jonn Patrick Complojer da Longega, che â dl 2015 ciafé avisa tan d’usc co Erlacher, rodunt 189.
N ater punt de pëis é gnü traté pro les desvalies. Ara se trata de na moziun che â sciöche argomënt da detlaré Mareo n comun zënza lus y laurs. Na dezijiun che valgügn comuns de Südtirol á ince bele tut. La moziun ê sotescrita da 8 porsones danter surastanc di paurs, de partis y aconsiadus comunai. Tla sostanza vëgnel scrit tla moziun che lus y laurs rapresentëia n prigo real por l’agricoltöra da munt sciöche ara é chiló da nos, mo ince por le turism. An se damana porchël che le Comun se portes ite cun düc sü stromënc por fá presciun y sostigní la politica ince provinziala da arjunje n smendrimënt dl livel de sconanza dl lu (ci che le govern provinzial de Südtirol se damana ince). Lapró vëgnel inciarié l’Ombolt da fá a na moda cun düc i mesi conzedüs dala lege che ”Mareo romagnes lëde da lus y laurs y che al vëgnes garantí la sigurté publica söl teritore comunal.”
Na te’ detlaraziun - aprovada al’unanimité - é da odëi por ci che ara é - n stromënt plü de sostëgn moral co pratich, ajache al ne sará nia na ordinanza che tëgn dalunc lus y laurs, mo al é n sëgn da pert dl Comun de sostëgn por na politica che vá dlvers da desgorje chisc tiers da nüsc raiuns.

Deplü sön la sentada dl Consëi, söl bilanz, la moziun y i atri punc tratá, ciafëise t’La Usc di Ladins di 22 de dezëmber.  (pablo)