Max tl’India por le maester ”Sai Baba”

Data

12 de jené 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le musizist da San Martin Max Castlunger á albü l’ocajiun da soné pro le World Music Festival tl’India, evënt organisé por recordé i 92 agn dl maester spiritual Bhagawan Sri Sathya Sai Baba
Sce an á pasciun por valch, ti mëton ite le tëmp, l’impëgn, l’anima. Y nia da inré sozedel che la pasciun tol na dinamica döta süa y cheriëia les ocajiuns plü particolares. Nia atramënter n’éra por Max Castlunger, musizist y percuscionist da San Martin de Tor, che s’á oramai fat n inom ince sura i confins fora por so förtl y la pasciun por les percusciuns. L’ann passé de novëmber él gnü a s’l dé por ël na ocajiun davëi particolara, chëra da jí tl’India a soné pro le World Music Festival, evënt organisé por recordé le 92ejim compliann dl maester spiritual Bhagawan Sri Sathya Sai Baba. Ince sce chësc é bele mort dl 2011, festejëion impó ann por ann so compliann, te n evënt sot la presënza de Madhusudan, che dess ester la porsona che dess odëi, sintí y ciafé l’energia fina dl Sai Baba defunt, por ti la trasmëte inant a sü fedei. Le Festival é gnü tigní tles vijinanzes dla cité de Bangalore, pro le Sri Sathya Sai Premamrutham Auditorium tl ashram Sathya Grama.
Tut pert á incër 100 musizisć da plü perts dl monn. Le grup musical talian é gnü coordiné dala ciantauturia Sonja Venturi da Moena, instëssa na fedela de Sai Baba. Ala pert êl Renzo Vigagni al piano, Fabrizio Cunial al cello, Desy Rossi ala viola, Nicolò Celentano ala vidora, Luca Geat ala vidora, Marcherita Caputo al mandolin, Christine Plaickner al fablò, Eleonora Brussato ala vidora, Rolando Biscuola ala chitara, Luigi Mariani al bas eletrich, Angela Chiocchetti de Fascia sciöche sopran, Viktor Mickovski sciöche tenor y nia inultima le percuscionist Max Castlunger.

T’La Usc di Ladins di 12 de jená nes cunta Max co che ara s’á porté pro che al á podü soné para, ci atmosfera che al ê tl gran tëmpl, n aspet particolar che al s’á tut para y valch che ne ti á nia scusé.  (pablo)