Alexia: n spirit lëde tl’Australia

Data

14 de fauré 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Pordërt êra jüda t’Australia cun l’intenziun da fá na esperiënza de mez ann, mo sëgn vir Alexia Irsara da La Ila da 8 agn tl continënt ”Down Under”. Ara abitëia a Brisbane, olache ara manajëia n local y se god deplëgn le clima bun cialdin. I un tut sö contat impara.
Alexia Irsara é da La Ila y á incö 33 agn. Sciöche tröc jogn, âra dan agn tut la dezijiun da se fá na esperiënza tl’Australia. So plan ê chël da sté 6 mëisc laía, se rodé jö le continënt, imparé da conësce d’atra jënt y fá esperiënzes nöies. Chësc ára döt cant fat, madër che fora di 6 mëisc él sëgn deventé 8 agn. Bele da atira ti ál salpü tan bel tl’Australia, che ara á tut la dezijiun da sté laía. Do plü agn de vita a Sydney, abitëiera incö a Brisbane, olache ara manajëia instëssa n local por n grup de restoraziun. Cina che ara é indere rovada tan inant, ára albü nia püces desfides. Chëstes éra indere stada bona da manajé sciöche al toca, cun so spirit lëde, n carater davert, na buna porziun de coraje y sambëgn gran orenté. I un contaté Alexia por ti damané deplü sön le tru che ara á fat. Cunté nes ára de vigni sort, dales dificoltés cun i papier al cöie meloni de nöt, ales sfachinades por n paiamënt dorata bas cina a so tratur dai fersci che ti portâ n davagn de 200 dolar al de.

La Usc: Dan 8 agn êste pordërt jüda t’Australia por 6 mëisc, sciöche tröc jogn fej. Ala fin este stada laía. Ci él pa sté che t’á tan tigní toch? I mini, al n’é nia sciöche se trasferí a Bornech o Balsan, mo al é dal’atra pert dl monn.
Alexia Irsara: Tl pröm abitâi a Bondi Beach a Sydney, a 5 menüc a pe da öna dles plü beles spiages dl monn. La jënt ch’i á incunté te chisc pröms mëisc m’á dër plaju y spo: podëi jí a passé mi tëmp lëde incër la spiagia me savô pö n bel mat. I abitâ te na ciasa cun jënt dal’Inghiltera, Francia, Austria y Spagna. Sön mi post de laur êl indere cuaji ma jogn australians de mia ete. Vigni de êl val’ d’ater da fá.

Döta la intervista ciafëise da lí t’La Usc di Ladins di 16 de forá.  (pablo)