Roman Pizzinini fej sorvisc pro Heli Tirol

Data

16 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tres na convenziun danter l’Aziënda Sanitara de Südtirol y la impreja de socurs Heli Tirol, pó le dotur de Badia fá sorvisc y intervënc sön le jolier austriach. I pröms vari concrec por na colaboraziun suraconfin.
Al ê i 2 de forá da iniann che al rovâ adöm söl Prener rapresentanc politics y dl socurs de Südtirol y dl Tirol, por inaudé ofizialmënter le proiet ”Rettung ohne Grenzen” - socurs zënza confin. En sostanza se tratera dla orenté da cherié sinergies y liams suraconfin danter les organisaziuns de socurs, ci che dess sambëgn porté ala fin a n miú sorvisc y a n intervënt plü asvelt por le paziënt. Che la pratica ne i é nia ciamó rovada do ala teoria, án indere messü constaté ala fin de merz, canche n grup de schialpinisć todësc gnô abiná da na lovina sön la Timmelsalm - sön terac de Südtirol. Scebëgn che le jolier de socurs ”Martin 8” dla compagnia Heli Tirol ess podü joré söl post te püc menüc, án tla zentrala da Balsan refodé l’invit, por lascé joré adalerch le jolier Pelikan 1 - che n’á nia podü arsí por le ciarü - y spo l’Aiüt Alpin, che á ala fin desfiré l’intervënt, mo á sambëgn albü cotan plü dî da rové pro la porsona ferida. Chësc caje á ince cherié n ”inzidënt diplomatich” danter i cés alc dl socurs südtirolesc y tirolesc, che s’á trat dant de vigni sort, mo chësc n’orunse chiló nia indô ciavé fora.
Che an fej sëgn valgügn vari por renforzé la colaboraziun danter i socursc de Südtirol, Nordtirol y Osttirol, desmostra la convenziun che l’Aziënda Sanitara de Südtirol á stlüt jö cun la firma privata Heli Tirol. L’acordanza jüda en forza ai 15 de ma - intant por n ann - prevëiga che n dotur d’emergënza dl ospedal da Bornech fejes sorvisc ince sön n jolier de Heli Tirol, i famoji ”Martin”. Pro chësc dotur se tratera de n ladin, le dotur Roman Pizzinini de Costa de Badia, che é spezialisé te chirurgia generala y á dal 2003 incá la formaziun da dotur d’emergënza. La convenziun prevëiga che le sorvisc mësses gní fat fora dal orar de laur - tanco tl tëmp lëde - por evité che le laur tl ospedal nen paies lassura. I sorvisc é porchël limitá a n numer mascim de 5 al mëis. Nos un incunté le dotur Pizzinini, por le damané plü avisa de ci che ara se trata.

Ciodí che al jora lafora, sön ci jolier che al jora y ci che al dij dl intervënt sön la Timmelsalm, podëise lí te nosta intervista t’La Usc di 18 de ma.  (pablo)