Daidede ince os ”Cují speranza”

Data

18 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
So Rosemary Nyirumbe dal Uganda á imparé da fá tasces cun lënghes de bossi. Na ert cun chëra che ara ti á dé na prospetiva nöia a n gröm de jones y ëres maltratades. Te Südtirol án coiü adöm 123.000 lënghes, mo l’aziun vá inant cina ala fin dl ann.
”Sewing Hope” - cují speranza. Chësc é l’inom dl proiet metü en pe da so Rosemary Nyirumbe, che é gnüda nominada dal foliet ”Time Magazine” öna dles cënt porsones plü influëntes dla tera. Ci ára pa fat? So mirit é chël da avëi imparé da na ëra filipina sciöche an fej tasces cun lënghes de bossi. Chësta ert - deache insciö pón davëi la tlamé - ára metü man da ti trasmëte a n gröm de ëres jones dl’Uganda. Ëres maltratades, traumatisades y rovinades da na vera zivila de passa vint agn tl paisc african. Les lënghes de bossi ne ciafon indere nia tan saurí tl’Uganda, porchël se lascion sön i paisc industrialisá, olache ares röia por le plü tl refodam. Te Südtirol él pié ia l’ann passé na racoiüda de lënghes de bossi, pro chëra che al n’é rové adöm cina ciamó 123 mile, de chëstes 20 mile dala Val Badia. L’aziun jará inant cina ala fin dl ann. Insciö vëgnel perié ince la jënt dla Val Badia da daidé inant para. Tla Val Badia pón dé jö les lënghes tl Comun da La Val, o ince pro Olga Moling, che pîta ion informaziuns plü menüdes, sot al numer 328/0717796. I recordun che al vëgn coiü adöm lënghes de bossi de boandes (Coca Cola, Fanta Sprite, Red Bull etc.), nia bossi de mangiaria por tiers o tono, mais y d’ater.  (pablo)