Badia te na atmosfera rock

Data

13 de setember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le mëis de setëmber á metü man bun por düc i amanc dla musiga rock: la sabeda, ai 1. de setëmber, él gnü tigní tl tendun pro paiun a Badia le "Summerend Concert", conzert rock rové oramai ala onejima ediziun
La festa á metü man dales ot da sëra te tendun a Badia. Dal momënt che un di punc plü importanc por i organisadus é tres da i lascé lerch a bands locales, él sté da aldí sön paladina dal mëteman dla sëra döes band metüdes adöm da jogn dl post: naota i "The Lightbulbs" y dedô "I Canaies". Personalmënter m’ál dër plajü da odëi ci ligrëza y pasciun che chisc jogn mët tl fá musiga, y i arati che fá musiga te na band sides na bela manira da passé le tëmp lëde por jogn y manco jogn. 

La serada é jüda inant cun döes cover bands: naota ti ára toché ai "Fly Fighters" tribute band di Foo Fighters, dedô éra jüda inant cun i "Guns Celebration", che á soné melodies conesciüdes dl grup "Guns’n Roses". Da öna na pert á i "Fly Fighters" porté dant cianties de n stil rock alternatif, i fajan onur ala band americana, dal’atra pert á i "Guns Celebration", rapresentan le stil "hard rock" di Guns’n Roses, soné tröpes cianties conesciüdes dla band, lascian aldí por ejëmpl les cianties "Paradise City" o "Don't Cry".

Por l’ocajiun se á indô tröc jogn y manco jogn reuní por se gode de bela musiga, se bëre val’ y passé na bela serada en compagnia. Tratan la serada él spo ince gnü anunzié le davagnadú dla ola dla fortüna, Alex Felder de Badia, che á davagné döes chertes por le conzert di Nightwish, che sará ai 14 de novëmber a Minca/München: complimënc! Dal momënt che la filosofia dl conzert é suradöt chëra da organisé na manifestaziun por i jogn, mo sambëgn nia ma por jogn, y da i pormëte a düc da passé na bela serada en compagnia, é l’entrada dl "Summerend Concert" ince en chësc ann stada debann. Por le bun garaté dla serada i vá n gran giulan a Guz Mangutsch, Silvia Valentin y Helene Mangutsch de Badia, les trëi porsones prinzipales che se á cruzié dl’organisaziun dl conzert. A düc chi che á daidé organisé, daidé tratan la sëra o zënza daidé a val’ manira, ales bands y ai sponsors, y a düc chi che é rová adalerch y nes á daidé fá festa tratan chësta serada rock che á albü n gran suzes, ti sporjunje n bel giulan!

Elena Frenademetz