Le pröm pest dla "Intlujiun" röia a San Martin

Data

18 de setember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Les secundes classes dla Scora mesana da San Martin de Tor á podü pié do ai 14 de setëmber a Balsan le pröm pest dl concurs de idees söl’intlujiun
Bele incër la mesa dles diesc danmisdé é en chël de le bel grup de scolars da San Martin ruvé cun la bona organisaziun da pert dl fiduziar dr. Gustav Frenademez ti salfs dla fiera a Balsan cun l’esposiziun "kreativ", olache la colaboradëssa Katja Sanin i aspetâ por i acompagné ai stands di workshops desvalis, a chi che i mituns y les mitans podô tó pert: cina les önesc ái fat laurs de creativité desvalis sciöche fá oredlins y portatlés de coran, decoré tortes cun pasta da zücher, depënje cun corusc desvalis, cují a mascinn y depënje ogec dla Thun cun fantasia.

Dales önesc êl spo söl program la premiaziun dl concurs söla "intlujiun", ala presënza dl vizepresidënt dla fiera da Balsan Claudio Corrarati, dla Intendënta dles scores ladines dr. Edith Ploner y dles responsables dl ufize por l’integraziun scolastica dl Departimënt Educaziun y Cultura Ladina-Sorvisc de Inovaziun y Consulënza y d’atres autorités. Le pest é gnü surandé en manira simbolica a valgügn scolars de 2aB, che l’á pié do cun ligrëza a inom de döta la Scora mesana da San Martin.

Le proiet é gnü lauré fora tl ann 20017/18 da düc i scolars, acompagná da n team de insegnanc: Tavella Alfred (ideadú dl’opera), Sottara Roberta, Ranalter Nora, Liotto Michela, Erlacher Julia y Dapoz Verena che á orü sotrissé insciö l’importanza y le valur dla diversité y dl’intlujiun ince te scora. Do avëi traté l’argomënt te classa te plü manires (presentaziuns PowerPoint, discusciuns, vijita ala Ciasa de Palsa, laurs de reflesciun te grup) eson passá a mëte man le laur pratich dl’opera tratan les ores de educaziun al’ert, te chëres che al é spo garaté n resultat de gran impat emotif, por sü corusc, significac, les impresciuns y la varieté de soluziuns poscibles. "I dijun n gran dilan a nosc diretur dr. Heinz Videsott che nes á dé la poscibilité da tó pert a na iniziativa che nes á fat plü stersc y tl medemo tëmp plö sensibli ala diversité, te dötes sües formes", chëstes les parores de contlujiun da pert dl corp insegnant, por n proiet che romagn por mirit de söes idees tl tëmp. 

Cotan deplü tla ediziun stampada de La Usc di Ladins da en vëndres che vëgn!