Capolaur "Nia de parora" a La Val

Data

19 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Garatada, y co, la premiera dla Pasciun di discepui aladô dl toch "Die Ungetreuen" de Karl Herbst cun musighes fora dl Messias de G.F. Händel!
Al é sté na rapresentaziun cun momënc dër soc, cun musighes de livel (orchestra ocajionala) y Cor de dlijia da La Val, döt sot la direziun musicala de Elio Clara. Le maiú aplaus ti vá a na reediziun de na trama vedla duimile agn, zënza tomé tl descritif, y cun na tenjiun nia da crëie canche i valurs che vëgn dant cun parores atoca tla emoziun y tla esperiënza de vignun che ciara pro tl publich.
Cun coreografies, datrai simboliches, datrai decoratives, vëgnel cherié la parüda che i incuntun vigni de te nosta sozieté. La pasciun instëssa y Gejú ne comparësc nia figurativamënter, mo tl comportamënt, tles dezijiuns, ti pinsiers y ti sentimënc umanns scëmpli y sinziers o falc, che pó spo zënza prigo da jí dlungia ia lié chi tëmps y i fac dla ultima Pasca de Gejú Crist cun düc i tëmps y ince cun l’aldedaincö. Ala fin romagn tl’aria na morala sotida, chë morala che é bunamënter le "comandamënt" che vá debojëgn defrunt ai atri, al forest, ala meseria y al picé. La speranza é spo chëra: che val’ se müdes tl miú, che i "discepui" müdes tl miú, che nos mudunse tl miú. Por combate les tëmes vál debojëgn de coraje. Chi da La Val á albü le coraje da realisé chësc proiet tan ampl por la partezipaziun y tan sot por vigni detai, cherian n spetacul de tenjiun, de bun jüch teatral, y de n cor (cun n solo bel y morjel dla jona Monica Vallazza da pel de iarina) che cun preparaziun y intensité de morvëia trasmët döta la forza, ince chëra che pê datrai tla trama desfantada ia y pordüda, o imbanida.

Les rapresentaziun te Dlijia da La Val vá inant dodoman domënia domisdé!