Splundrun söla strada dla Val Badia

Data

20 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Inzidënt che ess podü avëi de burtes conseguënzes, en vëndres söla strada dla Val Badia. N ciafér de n auto potënt á fat surpassades vagades y é salté adöm cun n auto che gnô decuntra. La patënt s’un é por n pez.
Baldi n’él tres ciamó de chi che tol nostes strades sciöche percursc de gara. Insciö éra ince sozedüda en vëndres ai 19 d’otober incër les 11 danmisdé, canche na porsona al volan de n Porsche potënt gnô da Longega ite cuntra Picolin. Sciöche an sá, n’é les poscibilités da surpassé nia tröpes, mo impó l’á le ciafér vagada plü iadi ince tles y dan les ótes. Insciö ál tlafinada superé l’ambulanza dla Crusc Blancia Alta Badia y orô ciamó passé ia n camion, canche al vëgn decuntra n ël dl post. Por tan che chësc ultim ais porvé da sté fora, n’é le splunder nia plü sté da evité. I dui auti é tociá adöm, cun gran dann material. Pro le Porsche él cinamai salté demez le toch y la roda iadedô, deperpo che l’ater auto á albü danns söla pert dant. Le ciafér che gnô decuntra y ne nen podô nia, á ince instës albü la peso, deache al s’á ciafé na gran scassada a ce y col, mo por fortüna nia d’atres ferides gravëntes. Le ciafér dl auto sportif ne s’á fat nia, mo al sará por n bel pez lëde dala patënt. Söl post él rové i Carabiniers d’Al Plan, la Crusc Blancia Mareo y ince i Stödafüch da San Martin de Tor. An pó ma apelé a plü respet canche an é sön strada. Jí massa debota ne mët nia ma al prigo nosta vita, mo ince chëra di atri.  (pablo)