"Lumen" ó dí löm

Data

05 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La fotografia de munt ciafa so museum sönsom Plan de Corones te na lerch de 1800 m2
I manajadus de Lumen incër la sozieté "Funivia Plan de Corones" SpA, se tol dant da presenté tl museum (che ó dí por latin "löm") retrac storics y inovaziuns digitales, mostres contemporanees emozionantes y produziuns spetacolares. Le program dess ester caraterisé a na manira interdisciplinara: alpinism, turism, politica, spiritualité y storia. Le tema dla munt dess insciö gní manifesté da deplü prospetives.

Dessegné dal architët Gerhard Mahlknecht, firma por le conzet y l’alestimënt le stüde giòforma y le grup de laur cun Beat Gugger, Martin Kofler, Richard Piock y Manfred Schweigkofler.

Lumen é aladô di ideadus na combinaziun de tëmp lëde y cualité fotografica, y dess stabilí standards nüs tla presentaziun dl retrat de munt. Chësc prinzip pón odëi tlermënter tla realisaziun scenografica di salfs espositifs y tl conzet museal. Le percurs realisé pita ai vijitadus na prospetiva nöia söl "vedl" tema dla munt, mët la munt al zënter de n scenar naturalistich de morvëia, cheriëia insciö sinergies emotives.

Reinhold Messner
Reinhold Messner é ince te chësc museum - independentemënter dala vijinanza ales atres döes sëntes nia dalunc (Museum "Corones" y Ciastel da Bornech). Te Lumen sarál metü fora la mostra permanënta "Messner meets Messner by Durst", dedicada a ël sciöche pionier alpin y promotur dla sconanza dles Alpes. Le percurs pëia ia cun n avijinamënt inovatif tres les tecnologies modernes che inaudëia le salf Adrenaline studié en colaboraziun cun Red Bull Illume. Ara se trata dl plü gran concurs de fotografia sportiva Adventure sön paladina mondiala, che tol ite i retrac sportifs plü straordinars y creatifs te forma de istalaziuns multimediales. "Al sará adrenalina", dij i ideadus.

Norbert Niederkofler
Tl medem frabicat saral da ciafé ince n restorant gourmet, dal inom AlpiNN, firmé dal cogo da trëi stëres Michelin Norbert Niederkofler. Le chef Marco Perez metará sön mësa, tres sot la direziun de Niederkofler, derzades arjignades cun materies primes locales y scëmples, tla tradiziun dla spëisa de munt regionala.
Tl frabicat nü sönsom Plan de Corones él ince n salf por seminars, conferënzes y manifestaziuns.

I partners de Lumen
I manajadus de Lumen á ciafé la colaboraziun da pert dl Archif tiroleje por la documentaziun fotografica y l’ert (TAP), che é spezialisé tla racoiüda, digitalisaziun y presentaziun de retrac vedli y storics. La sozieté DURST da Porsenú é le secundo partner teritorial cun söa esperiënza da leader mondial de tecnologies de produziun al’avanverda. La Durst sará responsabla dla reproduziun digitala dles fotografies metüdes fora.
N ater sostëgn a chësc proiet nü de Plan de Corones vëgn da "National Geographic", che é n partner internazional y porta adöm porsones da coraje y idees inovatives ti seturs dla esploraziun, dla inrescida scientifica, dla naraziun y dl’educaziun. Deboriada cun l’ater partner internazional, le "Red Bull Illume", gnarál documenté y mostré le spirit sportif tl concurs plü gran de fotografia sportiva d’aventöra al monn.

"Cook the mountain" röia sön Plan de Corones
Le proiet inovatif de Norbert Niederkofler che ciara ala coltivaziun y anuzada di produc sagns a "km 0" ciafará na söa sënta tl comples dl Lumen sön Plan de Corones. Al dess ester n laboratore de inrescida culinara che ciara dl ambiënt y dla sanité de ambiënt y porsona te na alimentaziun sana y scëmpla aladô dla tradiziun locala.

Daurida ai 20 de dezëmber 2018
Le comples nü sön Plan de Corones descëda la curiosité de tröc operadus tl ciamp dl turism y dla gastronomia, y ince i portadus dla cultura locala dla storia y dl’ert. Te chinescdé sarál la vernissaja. Y dedô ará spo ince Plan de Corones na oferta gourmet da pité. Le comples nü é a 20 menüc a pe dal Museum "Corones" de Reinhold Messner, che vëgn gestí da söa fia Magdalena. Plan de Corones n’é nia plü ma n travert schiistich y escurscionistich.

 (Iaco Rigo)