Ocio ala nëi sö alalt!

Data

12 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Apel dl Aiüt Alpinisć Alta Badia a chi che se mët sön tru te munt. D’öga él ince che i patruns dles ciases por sciori informëies sü ghesć sön la situaziun

Lönesc ai 10 de jügn: l’Aiüt Alpinisć Alta Badia é gnü cherdé por n intervënt sön Falzares por jí a daidé dui turisć todësc: ai orô arjunje la ütia Scotoni passan por la forcela Salares. Indere ési rová tres plü y plü tla nëi, s’á stancé jö y metô ince man da se temëi. I dui é gnüs recuperá cun le joler dl Aiüt Alpin y é gnüs condüc a Corvara. Por fortüna ne i él sozedü nia. Gnanca 24 ores dedô é i socoridus dl’Alta Badia bele indô gnüs cherdá. En chësc iade por jí a daidé dui turisć australians che ê jüs sö por la via ferata Tridentina y ne s’infidâ nia plü da gní jö. Ince chiló por gauja dles gran cuantités de nëi y ince chiló ési gnüs condüc jö cun le joler dl Aiüt Alpin.
L’Aiüt Alpinisć Alta Badia fej n apel a düc i amanc dla munt "da mëte dër averda por la tröpa nëi che é ciamó sö alalt". La sajun turistica da d’isté á oramai metü man y al röia alerch tres plü jënt te nüsc paisc, che orará ince se fá escurjiuns sö alalt. Cun le cialt jö ales basses podesson forsc miné che l’isté é ince rové sö alalt, mo indere - por la nëi tomada ciamó de ma - ne n’éra nia indlunch insciö. Cun le vistimënt y l’atrezadöra damat pó les porsones tosc rové te situaziuns ince prigoroses, porchël injuntunse ince nos l’apel da mëte averda y forsc él ince d’öga sce i patruns di eserzizi informëies i ghesć sön la situaziun sö alalt, por che jënt ne se mëtes nia al prigo y che al ne sozedes nia na desgrazia.  (pablo)