“LADINIA MEETS JAPAN”

Data

15 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks

Scialdi garatà ie l cunzert de Karin Nakagawa y Jean-Daniel Granruaz cun undesc pec de mujiga che ie stat n dumënia ai 14 de lugio n ucajion dl Di dla Unità Ladina tl Palaz di Cungresc a Urtijëi y che va ite te n proiet plu lerch metù a jì dala Union Generela di Ladins dla Dolomites, ulache l vën paredlà la doi cultures ladina y iaponeja, metan adum la mujiga tradiziunela ladina cun meludies iaponejes. La presidënta Milva Mussner: "La simbiosa tres la mujiga".
 
Na meludia ladina resta la medema meludia nce sce suneda da na artista iaponeja. L inn ladin "Bel lingaz dla oma Cara", mé per dì, resta te si meludia, unfat sce suneda da n ladin o da na iaponeja. Ma l ie mpo desferënzies: tla verscion iaponeja iel n’autra frasa, chël uel dì n’autra articulazion, n auter pensier de tact, che ne va nia ite te na metrica coche son usei tlo da nëus. Tan deplù iel unit ora la faszinazion y la particularità dla ciantia ladina, ma povester mo deplù la universalità dla mujiga. Ala fin dla finedes uelel vester sentimënt y respet per la mujiga y per la cultura. Sentimënt che ie unit ora te na maniera tlera, metù adum tla gran cualità nce tecnica di doi artisć: Karin Nakagawa y Jean-Daniel Granruaz.
 
Nakagawa y la stëiles
Karin Nakagawa à cuntà "dla gran emuzion che la mujiga me dà. Canche fove pitla y mi ava fova morta, ovi na gran tëma, y ti ove damandà ulache ie l’ava. Mi oma me ova iló dit de ti cialé al ciel, ajache tla stëiles iel l’ana de nosc defonc, y nce l’ava ie deventeda na stëila, che à te sé l lecort y la esperienza de chiche nes à lascià. L ie na rejon per lecurdé nosc defonc, ie l feje tres la mujiga."
 
La richëza dla ciantia ladina
Nscila Karin Nakagawa, che à cumpanià Jean-Daniel Granruaz, o cun na segonda usc, o cun na usc de sotfond, ma ciantan pona nce da sëula, mustran nscila su la rejon de vester dl iapanesc y de uni rujeneda dl mond, y nscila nce dl ladin, unfat tanc che n ie: la cultura ie una, y for granda y da na gran denità, identità y persunalità!
Danterite y denterora lasciova l cunzert lecurdé la maniera de fé de Angelo Branduardi, che à for cris tla mujiga y tla spiritualità la cuintessënza dla cultura y dla persona. Ma pona nce pec che jiva mpue’ dl viers dla bossa nova brasiliana y dl fado portughes, rujeneda che ie perauter scialdi daujin al ladin, coche sonn y prosodica, che ie la ntunazion o la mujigalità dla rujeneda nstëssa.
 
Paredlé la doi cultures dla Ladinia y dl Iapan
L cunzert jiva ite te n proiet plu lerch che uel paredlé doi cultures, chëla ladina y chëla iaponeja. Cun gran plajëi à la Union Generela di Ladins dla Dolomites laurà deberieda cun i doi mujizisć de gran cualità Karin Nakagawa y Jean-Daniel Granruaz. La mujiga ie un n ciamp. Ma pona iel mo truep d’autri elemënc che lascia udëi desferënzies, ma nce la cosses deberieda che l ie danter la doi cultures. Ala fin dla finedes se tràtel pra uni cultura de mantenì la ravises y de fé n viac de viers de chësta ravises che ie l vester plu sot dl ndividuum y dla cumenanza. 

La presidënta Milva Mussner: “La simbiosa tres la mujiga”
La presidënta dla Union Generela di Ladins dla Dolomites Milva Mussner à, te si paroles de ntroduzion, auzà ora che “l se trata, pra la jënt dla Ladinia y dl Iapan, de doi cultures dalonc y autramënter, ma che à mpo si semianzes, che lascia pro de jì ite te na simbiosa cun mujiga de tramedoi cultures.”
Milva Mussner à per l’ucajion sambën dat da lecurdé la gran desmustrazion sun Jëuf de Sela ai 14 de lugio dl 1946, la data che ie pona deventeda l Di per la Unità Ladina che vën festejà uni ann. Mussner à nce fat referimënt "al referendum di trëi Chemuns de Fedom, Col Santa Lizia y Cortina d’Ampëz tl 2007, cun l bujën che resta de unità danter duc i ladins, partii su te plu Provinzies y Regions, na unità che dà forza itevier y oravier." N rengraziamënt de cuer ti ie jit da pert dla presidënta Mussner ala Region Trentin-Südtirol, ala Provinzies de Trënt y Bulsan, ai Chemuns, al Diretif dla Union Generela di Ladins dla Dolomites, ala Unions di Ladins dla valeda, a La Usc di Ladins y a duc i cunlauradëures ulenteres che à judà pea per fé garaté l proiet y la sëira de mujiga. Mussner à mo auzà ora che chësc cunzert y la prejentazion dl proiet sarà mo te n valgun mënsc te n valgun luesc nce oradecà, tla ziteies.
 
Foto: Karin Nakagawa y Jean-Daniel Granruaz fotografia de Daniel Töchterle).

Deplì tla edizion stampeda ai 19 de lugio.

Galaria retrac