Comentar de pruma

Data

19 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Unse davëi davagné?
»I un davagné«, diji, tratan che le Senat á lité cuntra la ressoluziun presentada dai DEM sön le mudamënt climatich. »I un davagné«, diji, tratan che 43 püres animes á messü sté dis alalungia tles eghes, dlungia les spones de Lampedusa. Al é n spavënt! Y n spavënt é ince la noela dles Olimpiades surandades a Cortina-Milan. »I un davagné!«, diji.
Sambëgn che i davagnarun, te plü consum dla tera y strades nöies y na talianisaziun ciamó maiú tl ampezan. Y tles valades dlungia. Ai dij che al sará Oli­m­piad­e­s sostenibles.
I sun dër bogn da pordiché na chersciüda falada. I jun dlun' balan cuntra l'iceberg. Les Olimpiades é dessigü na buna oportunité por desfá ciamó deplü, toch por toch, les Dolomites. Y nosta identité. Mo i me damani: al sará bëgn n ciodí sce les candidatöres ales Olimpiades vëgn tres demanco? Te tröc paisc él gnü archité ia daldöt – ince cun referendums – l'impëgn da »condü a ciasa« i jüc olimpics. Insciö ênse ma plü restá de dui a salté por la devënta: Stocolma/Aare y Milan/Cortina.
Por ci é pa stá bogn chisc diesc agn de UNESCO? Na fondaziun che ne tol mai posiziun, che chir tres le dialogh cun chi che scraia plü dadalt, dassënn politisada y dessigü nia al'altëza de ci che ara messass ester: na marca de sconanza dl teritore y de süa popolaziun ladina. Ne messass nia l'UNESCO se bate decuntra?
Sce i jun inant insciö, risćiunse la banalisaziun dla contrada, na violaziun y na volgarisaziun de nosta tera. Minunse veramënter de podëi sfruté Milan cun sües gran vijiuns y cun süa comunicaziun sterscia?
Y sc'al foss Milan che se fej promoziun cun le martl Südtirol? Da statistiches fates, savunse che i sciori che nes conësc, evitëia da se lascé odëi canche al é evënc suradimenjioná respet ala contrada. Y sce la fidelisaziun de chisc ghesć gniss a mancé? I me tëmi dassënn da na pordüda de cosciënza, da na precarieté de valurs, dala pordüda de na vijiun plü bela y autentica de nosta Tera. L'importanza dla comunité é n valur. Mo i savun che les olimpiades de Sochi y Torino é stades na catastrofa dal punt d'odüda soziocultural.
Y ciamó val': minunse che Fodom y Col vëgnes plü conesciüs? Y co s'armoiará pa les porsones por rové adalerch? Cun la ferata? O cun le vedl proiet dl'Alemagna che é indô gnü metü sön mësa?
»I un davagné«, diji, tratan che püc se partiará sö le davagn y tröc nen pordará. Y ciamó me damani: á mo les Dolomites cun sü ladins davëi davagné?  (de Michîl Costa)

Galaria retrac