Comentar de pruma

Data

09 de agost 2019

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I vedli mejes se n va, un ndolauter
L ie cin’ menuc do la 12! Da coche n vëija tl stlarimënt da pert de Paulina Moroder, da liejer a plata 9, iel stat n gran mudamënt, n con’ di frabicac da zacan. I mec ne n’ie nia plu. N pert ie chësc struturel, sce n possa se nfidé a dì nscila, cun dantaldut i zëntri di paejes che ie unii »renuvei«, y ulache la cëses da zacan à messù ti lascé la lerch a frabicac nueves. N pert iel danz stat na mancianza de sensibltà da pert dla cumenanza, n pert y per truep dejeneies nce na gran iniuranza, cun i paures nstësc che ne n dajova nia de si vedla cësa. Ma pona iel nce la politica che se à arjumà de fé l fat y sie.
L ne possa nia vester che desëines y desëines de mejes se n ie jic tl mez secul passà.
L ie bën
vëira che l se trata de frabicac privac, ma i à mpo y dessegur na valënza publica, de valuta storica y culturela y identitera. Da tlo l bujën de se muever. Co fóssela pa a ti judé ai patrons dla cëses vedles, cun cunsulënzes y proiec de cësa da pert de architec y tecnics dla Provinzia, cun n sustëni finanziel sun mesura?
La urbanistica de cuntrat ne à ënghenó judà pea. Nia dinrer ne n’iel suzedù che n à tëut cubatura de n vedl mesc per la spusté nzaul d’auter, per na cësa nueva. Y mo na gran dumanda: ciuldì àn pa messù, ciuldì muessen pa zaré ju la vedla cësa per n fé su na nueva? Ne jìssela pa nia a lascé pro la cubatura y mantenì la cësa vedla cun l tublà, che passa pona o al’aministrazion publica o a na lia o a n privat che se mpënia dl derturamënt y mantenimënt, aldò de criteres tleres dac dant tres lege? Tlo mé n valguna reflescion, n valguna dumandes. Per dì ala fin che l ie cin’ menuc do la 12! Mi bon berbesc y andes dla politica – cun dut l respet – dajëve tosc, sce la va mo ncuei, na scasseda!  (David Lardschneider)