Desche les mendranzes á da sćiampí por nia sparí

Data

11 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A Mundimitar él gnü stlüt la scora elementara. Le lingaz slaf vedl vir ince tles poesies scrites da sü abitanc
"Paisc dla poesia" ti vëgnel ince dit, a Mundimitar, chësc pice paisc sön n col nia dalunc dal mer y Termoli. Passa cincanta dess ester les poetes y i poec che scri tl croat vedl, sön na popolaziun de 350. Strofes de poesies é scrites sön tofles fora por le paisc, ares cunta de emoziuns y amurs por le paisc, la cultura, les usanzes. La domanda podess ester: Salva pa la poesia le lingaz?
Da dui agn incá n’á le paisc nia plü la scora. Sce l’interes por la conservaziun dl lingaz y dla cultura slafs foss sté gran assá tles stües de comun y ti ministeriums a Roma, fóssel gnü studié fora n plann ütl y efiziënt por fá jí i mituns de düc trëi i comuns – ciamó aldedaincö de lingaz slaf – te na medema scora elementara y mesana. Chësc n’él nia gnü fat, sëgn vá i mituns de Mundimitar te na scora de n paisc talian dlungia.
L’assimilaziun linguistica y culturala ti trëi paisc molisians á bele metü man, chël che davagna é te chisc caji tres le maiú y le plü sterch. Zënza na sconanza findamentala, trata tres ince tla pratica de por de, ne suravir nia na mendranza desco la slava molisiana. Impó se proa deplü porsones da se organisé ti paisc, scrion fora costantemënter n pest de poesies, meton da jí anualmënter festivai de musiga y costüm popolar, se incuntan te cërtli culturai por baié, carté y fá aurela cörta. La vita vá inant. La dlijia che adorâ cina al secundo Conzil Vatican le latin á metü man da adoré le talian. Por croat él ma da ciafé püces oraziuns, desco le "Nosc Pere tl Cil".
Al é da recordé ince la storia dla umanité, dantadöt sëgn te nüsc tëmps dles gran migraziuns. I imparun dala storia che al é tres sté migraziuns, l’ejëmpl di croac (y lapró ince di albanesc) tl Zënter y Süd dla Talia insëgna che passé ia le mer é deplü co ma n iade aventurus, al é n salvataje de plü versc. Sce an pënsa tan de raiuns che é gnüs popolá tla Talia da porsones, families, grups, popui intiers, spo s’indeblësc teniade la conzeziun y la idealisaziun de na "gran naziun taliana".

Comentar dl redadú Iaco Rigo