Comentar de pruma

Data

11 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Mobilità: ge vel coraje e anteveder
Canche se sfoa, se ge varda a n prospet de reclam de la Azienda de Turism o de privac hotelieres se lec bendeché »Aria Pura«, »Pace«, »No stress« e coscita inant. Ence i retrac, duc con n bel ciel brun, ence chest l vegn garantì al medemo priesc!!!
E canche i turisć i rua, o i pertende o i se lamenta. Dò aer lascià sia zità e sie biteboi, l'é ben natural che no i lo volessa troar ence olache i va ai fresć, n pec de dis...
La neva de chest istà 2019 te Fascia l'é stat la scomenzadiva del Comun de Sèn Jan de serar al trafich privat le doi valene, chela del Vaiolet e Gardecia e chele de Sèn Nicolò/Ruacia e di Munciogn, la Mont de Poza.
E per mie cont la scomenzadiva la é jita te la dreta direzion, aer chela pasc e chel benstar che i turisć se speta e no demò, ence noi enstesc.
O no vegnel scrit coscita su la reclam?
No l'era possibol jir inant desche i egn passé olache demò te la mont de Ciampié l'é stat dombrà passa 1.000 auti al dì. Auti che la maor part i jìa ite e fora, sul domesdì via, bele demò per passar n goc de temp, te na dì ruar sun duc i jouves empifan l'aria, ruar daperdut e amò valch de auter...
Ma da che che é sentù da l'ombolt chi che se à levà l'é stat na part de noscia jent, chi che dojessa esser contenc de no aer l biteboi e te chest cajo sun nosce mont.
E se tant pardicion che vivon de turism, emben peisse che chesta dezijion la vae te la giusta direzion, i turisć i se n va a ciasa contenc de troar »part« de nosce mont descheche le vegn reclamisade sui prospec.
Chesta l'é, a mie veder, la mior reclam.
E a noscia jent, sessaben chi che se lamenta dò a dò e de dut, ge domane: »No fossel besegn de aer n goc de pazienza e de veder se i provedimenc metui en doura chest istà i portassa de bogn fruc tel davegnir?«
Valch turist se à lamentà, é sentù, che i priesc di taxi envers i Munciogn e Ciampié e le sentadoe de Pera e Ciampedìe é massa ciare. Ti etres lesc de turism, per ejempie te Gardena e te Badia, dant de montar su na sentadoa o n taxi besegna paar la piaza de l'auto o no? 5 euro i più bonmarcé, 7 euro la maor part, per na dì.
E te Fascia nience n centeisem, desche se endrezar piac per i auti o i mantegnir no costassa nia. E n bon pec de turisć i se n jìa a pe envers Ciampié o i Munciogn. Canche vegnarà rencurà sù l legnam anter i Pians de l'Ancona, tal Crist, e la mont de Ciampié, podarà esser endrezà n troi fora de stradon asfaltà.
Ben segur l mal l'é stat che te Fascia dut vegnìa consentì, per egn e egn, dut debant e gratis.
Desche i egn passé no la podea jir inant, besegnaa ge dar n tai per l benstar de duc, noscia jent e i foresć che vegn ai fresć.
Aon tedant n bon pec de meisc per ge pissar dò a valch mender mudament, se proprio l'é besegn.
L provediment del Comun de Sèn Jan aessa besegn de esser slarià fora a de autre mont de Fascia, per ejempie chela de Fuciada, olache auti va inant e endò da beleche dute le ore del dì.  (Fernando Brunel)

Galaria retrac