Comentar de pruma

Data

18 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Onor al popul curdo
Su La Usc di Ladins numer 3 di 17 de jené del 1998, acà beleche 22 egn, l'era stat publicà na poejìa dal titol »Al sudà zenza inom«, scrita dal poet curdo Abdullah Pashew. La era stata traslatèda per ladin da Danilo Dezulian del Garber, che l'aea metuda sù con chesta paroles de compagnament: »En onor e en segn de solidarietà col popol curdo, na mendranza spartida e massacrada da 80 egn en cà sot i eies de duc, con la complizità viliaca de duc chi paìjes che se chiama depojitaries de libertà, de democrazia e de umanità.«
Volon endò ge dèr lèrga per la gran atualità de chest scrit, che ne domana de no desmentièr l popul curdo, da secoi spartì da confins volui da etres, semper martorià e mai sotmetù, ejempie de dignità e amor per la libertà, che ne desmostra te anter l'auter che la democrazia, l respet per la femenes e la solidarietà pel jir a una co la religion de l'Islam, contra ogne fanatism e fonda­mentalism.
L'é na giusta maniera per recordèr ence la fegura de Danilo Dezulian del Garber, che ne à ensegnà che se sentir n picol popul, o na mendran­za, no vel dir se serèr egoisticamenter te si confins, ma esser solidai con duc i popui manacé e verjumé da l'ingiustizia.


Al sudà zenza inom

Canche na delegazion
vijita n paìsc forest
la porta na corona de fiores
su la fossa del Sudà zenza inom.
Se doman
ruarà na delegazion te mie paìsc
e i me domanarà:
»Olà él la fossa del sudà zenza inom?«
Gio responaré:
»Ecelenza,
su le rive de ogni ruf,
sui sćialins de ogni moschea
dedant l'usc de ogni ciasa
dedant la porta de ogni gejia,
te ogni cogol,
sun ogni sas de cheste crepe,
sot ogni alber de nesc bosć,
su ogni piz de la tera,
sot ogni becol de ciel,
no assà paura, Ecelenza,
enjeneiave aló
e meté aló la corona de fiores.«
Danilo Dezulian dal Garber
 (de Lucia Gross)

Galaria retrac