Comentar de pruma

Data

22 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Salvèr, o arneèr
I mudamenc climatics, che amò zachei se ostina a neèr, deslomenan la joena Greta Thunberg, i à palesà amò n'outa chisc dis passé si efec grieves, ju per la Tèlia e ence chiò entorn, ne fajan entener che no l'é demò vèlch che é dalonc da nos. Chisc gregn mudamenc climatics subitousc sozedarà semper più de spes e cognaron ence nos se usèr.

La tradizion e la cultura de solida­rietà che aon rità te noscia tera se à concretisà amò n'outa tel prezious lurier di studafech, che no lasciaron mai de rengrazièr per dut chel che i à fat ence chisc dis passé te noscia valèdes per l burt temp. Ic l'é i componenc de chel volontariat che l'é stat e cogn seghitèr a esser l fondament de la vita de l'umanità, che demò ensema la se sèlva, o ensema la arnea.

L'é stat rejon de legreza, veder che ampò no demò chiò, ma te duta la Tèlia n muion de joegn se à moet, i se à metù a la leta e i é jic, soraldut a Unejia, a veder se l'era de besegn de fèr zeche, e i se à metù a tor fora da l'èga e sièr un a l'outa i libres enaghé: chi de la maraveousa libreria Acqua Alta, ma ence chi de la biblioteches publiches.
Na mobilitazion che à recordà chela del '66, canche a Firenze i »agnoi de la pauta« aea salvà dal dessatament mile e mile libres, armé de gramièi, stivèi e maneces de goma, sfoes de chèrta che sia sù, che vegnìa metui anter na piata e l'autra di volumes preziousc per­cheche no i se roìne deldut.
Ence enlouta l'agajon no ne aea sparagnà, e no l'aea sparagnà libres preziousc nience a Trent.Père Frumenzio Ghetta de Martin, che l'era tel convent francescan de Sèn Bernardino, recordèa de spes l lurier de chi dis per salvèr i libres e i documenc de la Biblioteca: un per un l li netèa da la pauta e l li tachèa sù a sièr con la clupes sui fii trac a soreie. Enlouta, da la dedizion per salvèr chi papieres, l'é nasciù te nosc gran storich l'amor per chela preziouses testimonianzes storiches.

Salvèr i libres, descheche ne disc l roman Fahreneit 451, l'é l simbol de la volontà de salvèr l prejent e l passà per l davegnir.

L'é azions che empienesc l cher e ne dèsc speranza de poder se salvèr, de no arneèr tel busc fon de chi che sacrifichea dut a si enteresc personèi, che sie mudamenc climatics o Mose, e de chi, amò più picoi e meschins, che al ciaut e sut i é bogn demò de critichèr crean competizions anter lesc e persones che à de besegn, per giustifichèr sia nulità.  (de Lucia Gross)

Galaria retrac