Confermèdes la ressorses per l’informazion

Data

04 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A la Conferenza de la Mendranzes de la Provinzia de Trent l’é stat rejonà di intervenc a favor de ladins, mochegn e cimbres 
La 29^ Conferenza de la Mendranzes, che se à tegnù en lunesc ai 25 de november a Vlarotz/Fierozzo, l’é stat l’ocajion per rejonèr de l’ativitèdes e di projec che la Provinzia de Trent met dant per la mendranzes sun sie tegnir: ladina, mochena e cimbra, ma ence per fèr l pont de la situazion tel ciamp de la sanità, de la scola, formazion, lurier e de la politiches de svilup. 

»Rejonèr de mendanzes – à dit defat l president Maurizio Fugatti – vel dir rejonèr ence de mont e del raport anter zenter e periferìes, anter la arees dezijionèles prinzipèles e la valèdes. Chest l’é al zenter de l’azion de chesta Jonta, descheche l’é vegnù fora ence te la discuscion di Stac Generai de la Mont. Se troon chiò dò n an de legislatura per tor dant desvalives argomenc che revèrda la defendura de l’identità culturèla e linguistica de la mendranzes. Te chesta Finanziaria aon tout dant l problem del spopolament di lesc più dalonc dai zentres, con i didamenc per i neves nasciui, col tor via l paament de l’iscrizion a la coes per i pìcioi e l sostegn, très l’Itea, a la families che vel se tramudèr sa mont, a scomenzèr da Luserna. Al zenter de noscia azion – à amò dit l president Fugatti – l’é l potenziament di coleamenc, con l’empegn de meter ogne an 2 milions de auro per l’autobus. Te la Finanziaria aon pervedù ence l’indicator del svilup teritorial, n strument n muie utol e prezis per valutèr coluns che l’é i sciti che padesc de più.«

Se i Mocheni e i Cimbri i à soraldut l problem del spopolament de si lesc, la situazion te Fascia é desvaliva, descheche à recordà la senatora e procuradora del Comun general de Fascia Elena Testor. Chel che lea la mendranzes del Trentin l’é soraldut la defendura del lengaz e de la cultura. Per chel che vèrda l lengaz la procuradora Testor à dit che ge vel maor atenzion no demò envers i joegn che no i perde deldut sia rejonèda ma ence envers i neves locutores, chi che vegn a stèr te Fascia e no i é de marelenga ladina. L conseier provinzièl ladin e vize president del Consei regionèl Luca Guglielmi à palesà sodesfazion per la Comiscion paritetica Provinzia-Region che la cognarà se cruzièr de la pianificazion de la scomenzadives a favor de duta la mendranza ladina e l’à sotlineà l besegn de esser più prejenc ence te la sentes europeènes.


L'articol va inant su La Usc nr 48 stampèda ai 6 de dezember



 (MCI)