Inzidënc cun salverjin: le ju de Furcia dancá

Data

04 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Te Südtirol él vigni ann incër 900 inzidënc cun salverjin. Furcia te Mareo alda pro i posć olache al nen sozed le plü.
Ester él da parenté: an vá cun l’auto sön strada y teniade saltel ca n tier. La maiú pert di iadi vára bun, mo alüsc sozedera ince che an salta adöm, gonot cun le tier mort y gran dann söla banda. Aladó de dac dla Federaziun dla Ciacia de Südtirol sozedel sön les strades de nosta provinzia vigni ann apresciapüch 900 inzidënc cun salverjin. Tl 87% di caji se tratera de rehli. La lege provinziala prevëiga che i inzidënc vëgnes dá dant anter 24 ores pro le retur dl revier dla ciacia, le verdaciacia o i verdabosc. Sce le salverjin mör, spo pó chël che á fat l’inzidënt se tigní la cern, mo le dann de banda mëssel por le plü se paié instës, tan inant che al n’á nia n’assiguraziun aladó. La maiú pert di inzidënc sozed canche al albiëia, da d’aisciöda y da d’altonn. Chisc é i tëmps olache i rehli é plü atifs. Sce an ciara olá che la maiú pert di inzidënc sozed tl Südtirol, spo rovunse ince tla Ladinia, olache le Ju de Furcia danter i comuns de Mareo y Valdaora é pro i posć plü atocá. D’atri posć cun tröc inzidënc é la strada danter Blumau y Pruca, sciöche ince danter Prad am Stilfserjoch y Glurns.
Eurac Research s’á tut a cör chësta tematica y organisëia na manifestaziun aposta, ai 6 de dezëmber dales 14:15 tla Ciasa Kolping a Balsan. Te chësta ocajiun vëgnel porté dant informaziuns plü menüdes, dac y zifres en cunt di inzidënc cun salverjin sön les strades dl Südtirol. Al gnará baié dla dërta manira da rovëne por evité de chisc inzidënc, mo ince dl proiet europeich "EnVeROS (Environmental Education through Roadkill Observation Systems). La manifestaziun é daverta a düc y debann, mo al é da s’anunzié sön https://it.research.net/r/DCK62XH  (pablo)