Fotos de Col per fé reclam a Selva y a La Rocia

Data

04 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Eror tl material promozional porté da la DMO Dolomiti a les ultimes fieres dl turism europeich.

L material de tesć y fotos, co che la DMO á spezifiché tla publicazion enstessa, fossa vegnú mané dai ofizi, ma i fai s'á en chest viade encrojé plu y plu outes. Al scomenciament dla pert dedicheda a la Val Fiorentina él na bela foto de Col con sia gliejia y plu inant, olá che al vegn scrit i contac dl ofize de referimenti, él na bela foto de la Gusela y dl jouf de Giau. Sot la foto dla gliejia de Selva él endere i referimenc dl ofize turistich de San Vito de Ciadoura y tla sezion „Estate a Rocca Pietore“ véiden coch foto na bela veduda sun la Cesa de Jan a Col
Do da chestes consciderazions á l assessour Troi volú ofizialisé sies declarazions tla letra che ves porton dant chiló entiera. Chesta vegnirá maneda a la DMO Dolomiti y a duc i enc che á patroziné chest reclam. Reclam che é bele vegnú porté a les fieres dl turism plu conesciudes tla Europa (Roma, Londra) y che truepa jent á donca bele abú sot i uedli. Demé tl davegní vedaronse cala che sará la resposta o la spliegazion che la DMO dará sun la chestion.


Stimeda DMO Dolomiti,

Ves scrivon per via dles fotos che i on vedú publichedes sun l volum I dé fora dal consorz DMO Dolomiti con l patrozine dla region Veneto, dla provinzia da Belum y dl Fondo FCC.

Dal pont de veduda storich – cultural é l comun da Col tres sté ladin y per chest féjel pert, adum al comun da Fodom, de chela val a chela che trueps ladins ti dij „Fodom/Col“.

Do cie che an á podú lieje, messonse ester de contra a cie che al é vegnú scrit te vosc material promozional: i ne podon nia azeté che la glieja da Col, emblem de nost paisc y de nosta cultura, a plata 54, vegne deda dant desche pert dla „Val Fiorentina Selva di Cadore“, che la Cesa de Jan, senta dl Istitut Cultural Ladin dles trei comunités de Col, Fodom y Anpezo y simbol dla storia y cultura ladina de nosc luesc vegne publicheda a plata 48 sot „Estate a Rocca Pietore“ y nience che l jouf de Giau, ejempl de conservazion de nost bel ambient da mont, vegne metú tles plates 56/57 sot l inom de „Val Fiorentina – Selva di Cadore“.

Te dut chest ne lascia DMO Dolomiti nia demé capí de ne conesce nia bun assé l teritore per chel che ala fej reclam, ma ence na gran mancianza de respet ti confronc de nostes comunités, na mancianza che vá a ruiné nosta imagina, nosta cultura y nosta identité ladina.

L assessour al turism dl comun de Col

Maurizio Troi