L’Istitut a radunanza

Data

12 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
DOMAN, ai 13 de dezember sarà n moment spezièl per l’ICL, che porta dant con n muie de neva produzions la conclujion de l’empegn de 40 egn del diretor Fabio Chiocchetti
L’é dassen na produzion che fèsc marevea, chela metuda dant ti ultimes 12 meisc da l’Istitut Cultural Ladin.

Acà n an l’é stat prejentà l liber »Scritores ladins, Materiali per la storia della letteratura ladina di Fassa«, scrit dal diretor Fabio Chiocchetti. De oril l’é ruà sun desch l liber tant spetà »La Valle di Fassa nelle Dolomiti« che de grazia al lurier de Cesare Bernard à permetù de ge meter te man di fascegn la enrescides storiches de P. Frumenzio Ghetta. D’istà, ensema con l’editor Nuovi Sentieri, l’ICL à prejentà »La grande strada delle Dolomiti« de Karl Felix Wolff e en ùltima enstadì l’é ruà l liber de Cesare Poppi »Saggi di antropologia ladina e alpina« (de più su La Usc stampèda!). Passa 2500 piates de studies e enrescides che ge dèsc fondament a la cultura e a l’identità ladina.

Ma no la é amò fenida, ajache te la radunanza de en vender ai 13 de dezember vegnarà prejentà etres 4 neves prodoc. L prum l’é n auter gran volum de documentazion storica sul Giudizie de Fascia dai Ac del Prinzipat vescovil de Persenon studié fora da Rita Gratl, rencurà col didament de Angela Mura; sarà dapò l nef numer de Mondo Ladino, che regoi studies e tesi di partezipanc al prum cors de Antropolad e no menciarà l tradizionèl Calandèr Ladin rencurà da Alberta Rossi e Nives Iori e dedicà chest an al bosch. En ultima vegnarà prejentà per la pruma outa n nef filmat, la video-fiction »La vivana e l cian« ispirà a na veiopra contìa populèra touta sù da Amadio Calligari, che vegnarà dapò metù te la sala de la modernità del Museo ladin.

Se trata segur de n moment particolèr per l’Istitut Ladin, che segna la conclujion de l’empegn de 40 egn da diretor de Fabio Chiocchetti, e chesta neva produzions raprejenta donca l finèl de egn e egn de projec che à fat crescer l’Istitut e portà luster a duta la val.

Na rejon de più per no mencèr a chesta radunanza doman, en vender ai 13 de dezember, da les 17.00 te Museo Ladin.  (LG)