Basta vertores!

Data

06 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Comentar de pruma de Pablo Palfrader
Pordërt messassel oramai ti ester tler ala maiú pert che la mudaziun dl clima n'é nia val' che mëss pormó gní... ara é bele chiló. Chësc ne dij nia Pablo; chësc dij oramai la gran maioranza di scienziá che laora tl ciamp. So apel é: mudé direziun, mudé stil de vita, mudé manira de ponsé y de fá. Chësc n'é indere nia tan saurí, do agn y agn che al nes é gnü pordiché dant che l'economia é le valur plü alt de düc i atri, che sce l'economia ne crësc nia junse do l'ega fora, che sce ara crësc, spo crësc ince nosc bëgnester, spo crësc ince nosc bëgnsté. Baujies: ai nes á trapolé. Profit zënza limit y sconanza dl clima ne vá nia a öna. I messarun pormó ciafé la dërta balanza.
Tan rî che al é da mudé
direziun odunse n iade implü pro l'enejima conferënza söl clima, che vëgn tignida cina ai 13 de dezëmber a Madrid, olache an á gran dafá da mëte adöm düc i cés por traverc concrec. Chësc ince deache i interesc é desvalis y chisc traverc se damana mudaziuns radicales. Al ne basta nia ma plü de te' pices aziuns che i somëia deplü a marketing co a orenté frëma da mudé valch. Y spo él tan de chës lobbys doía che arfera por ne mudé nët nia, gonot ma deache al ti rovinass n pü' de chël profit che ares arjunj ion söles sciables di atri.
Zacó les sintiunse pö ince chiló da nos les mudaziuns dl clima. Metun man cun les niores »Mammatus« odüdes l'ann passé: n evënt plü che rér, cis te nüsc raiuns. D'otober él spo gnü le gran vënt »Vaia« che á rosedé bosc intiers; iniann d'isté él sté le gran cialdun cun temperatöres da record; d'otober unse albü un di mëisc plü cialc da canche al vëgn fat les mosoraziuns; de novëmber spo fora de nia passa n meter de nëi cun n tëmp che an ne capî gnanca cis ci sajun che al é. Por n ann su dijessi che al basta. Impó vëighi, cis sön i social, de chi che s'impegnëia da propaghé de vigni vers canche val' Pinco Pallino dij che la mudaziun dl clima n'é döt nia vëi. Da me infora é chëstes zacó ince vertores por lascé indó n iade döt sciöche al é, por ne messëi nia mudé nosc stil de vita y podëi consumé y fá inant sciöche i un dagnora fat. Indere: sce i ne se dun nia n scassarot, sarál la natöra che s'l dá – sciöche ara fej porater tres plü gonot. Y canche la mudaziun dl clima mët man da fá me – ala porsona y a so tacuin – sarál ince i ultims che s'intënn che al n'ê nia na invenziun. Fá val' de concret podunse düc: na tascia de peza impede de nylon, roda o bus impede l'auto, destodé l'ega tratan che an se lava i dënz, na löm demanco che verd te ciasa, adoré la braia, la joca y le smartphone dl ann passé, riziclé y tan d'ater. La mudaziun dl clima mët man da nos... da te, da me.

Galaria retrac