La Usc di Ladins

Se arvejina oramai l terzo cedean da canche, ai 3 de mé del 2017, Benjamin Dezulian de 26 egn da Pardac à perdù tragicamenter la vita te n azident. Benjamin l se aea fat aprijièr a livel profescionèl con sie lurier giornalistich per desvalives sfoes e radio ence fora da la provinzia, e a livel uman per sie empegn tel volontariat e te la comunanza. N muie de amisc à volù tor sù sie testamonech e i à metù sù la sociazion »Amici di Benjamin«, che à pissà a na vida per portèr inant apontin i doi valores maores de Benjamin: l’é nasciù coscì l concors »Cuore e talento«, n pest giornalistich portà inant con patrozinie del Comun de Pardac e del sfoi L’Adige, che vel ge dèr luster a stories e emozions leèdes al volontariat e l’envìa a les comunichèr travers paroles o fegures.

Ruà a la terza edizion, chest concors che al scomenz se à out demò ai joegn e dapò l se à avert ence la jent grana, l’à metù dant de autra neves: chest an no vegn tout dant demò scric e retrac, ma ence video, curc filmac da poder realisèr ence col fonin, e se pel tor pèrt ence a cobies.

Doi l’é i argomenc che vegn metù dant te chesta edizion: apede a »Raccontare il volontariato«, tem de la edizions passèdes, l’é ence »Cicatrici: risollevarsi dopo la tempesta«. L prum tem pel contèr esperienzes de volontariat de ogne sort, personèles o de etres, l secondo, che fèsc referiment ben segur a l’efet del tormen Vaia sul bosch de noscia valèdes, l’é da entener ampò ence a livel astrat, te ogne contest de tragedies ence de persones.

Se pel manèr ite sun un de chisc doi argomenc n test scrit de no più che trei piates con una o doi fotografìes con na curta didascalìa o n curt video de no più che 4 menuc tout jù en orisontal, con n titol. 

I lurieres che rua ite vegnarà valuté da na jurìa de esperc del setor giornalistich, fotografich e video e vegnarà premià i prumes 3 classifiché tant de la sezion scric che de la sezion video con n pest rispetivamenter de 300, 200 e 100 euro.

I lurieres cogn vegnir mané ite dant dai 15 de mèrz a na vida telematica dal sit www.cuoretalento.it, olache che troa ence l formulèr de adejion che cogn vegnir scrit ite e sotescrit dai partezipanc.

La zerimonia de premiazion vegnarà fata ai 9 de mé te Comun de Pardac e dapò te la Sala Rosa del medemo Comun duc i lurieres partezipanc restarà fora te na mostra enscin ai 17 de mé.

Per aer ogne autra informazion se pel jir tel sit www.cuoretalento.it, olache se troa l comunicat stampa e l regolament, o manèr na mail domanan schiarimenc a info@cuoretalento.it.


 (Lucia Gross )