La Usc di Ladins

»Ruèr su la ponta l’é facoltatif, vegnir deretorn l’é obligatorie«. 

Coscita à scrit Ed Viesturs, un di più forc alpinisć di Stac Unii. Na frase che à fat sia ence l grop da mont Bela Ladinia che enstadì à endrezà, en colaborazion con l Socors da mont, doi scontrèdes per duc i pascioné de la pouses e i schiadores. 

Tel prum enconter l’istrutor regionèl del Socors Robert Cecco à metù dant n grum de informazions su la valutazion di risesc sa mont, sui materièi e su coche cogn vegnir fat l prum socors te levina, ge jan dò a la linees guida de l’istrutor nazional e tecnich del Socors da mont Maurizio Luztenberger. 

Dapò vin Fraìne l’é stat la desmostrazion pratega con trei istrutores regionèi. Chiò i partezipanc à cognù troèr fora i corpes da sot la neif, à fat la proes con la sondes e la pèles, ge é stat moscià coche funziona i sistemes de localisazion ARVA e Recco e i à emparà che che l’é miec fèr o no fèr canche valgugn resta sot na levina. Jir sa mont en segureza l’é emportant e ge vel cognoscer ben duc i materièi e i sistemes per portèr l prum socors percheche, se aessa da sozeder, se posse esser de utol a salvèr na vita.

De più su La usc stampèda de vender ai 24 de jené 2020.  ( Monica Cigolla)