La Usc di Ladins

Nosc letours y inserenc che speta ert edema per edema a »La Usc di Ladins« pó se enconforté: da sen inant ciafarai plu varieté y richeza, te articui y rubriches. L'editoura dl foliet, la Union Generela di Ladins dla Dolomites, con sia presidenta Milva Mussner á aprové n plann de colaborazions esternes interessant y utl.
D'auton 2019 óva »La Usc di Ladins« scrit fora n concors per cherí colaboradours desferenc per l laour redazional de nost foliet, con l bon ejit de feter does deseines de interessedes y interessés, dantaldut joenes y joegn che á preferenzes y referenzes per arichí l contegnú y la informazion de nost edemanal. Con chest numer peia via bele na pruma pert de chest vers.
Lapró ciafa vigni redazion de valeda n/na praticant/a continuatif/va per i agn che vegn. Tres la posci­belté de plu colaborazions esternes vuel l'editoura y la redazion arjonje deplú fins: – auzé la varieté, richeza y cualité dla informazion; – amplié la spana di interesc desferenc di letours tles vals ladines y foradecá; – atré tres plu y plu l interes de par­te­zi­­pazion di joegn; – lié adum cotant deplú les generazions te na colabo­razion deberieda, dantaldut la plu joena y la manco joena; – amplié, de seghit, la cuantité di letours, di abonamenc, di inserenc.
»La Usc di Ladins« é l soul foliet che ti dá la consciderazion a duta la Ladinia storica, y porta pro direta­menter al mantegniment dl lingaz ladin y dla comunité ladina. Al é »ousc« y »portaousc« de paisc, vals y dla mendranza ladina, cie che comunicheia y documenteia i aveni­menc y i fac plu importanc. Metú adum da na redazion, réstel n »foliet fat da trueps«, che á na funzion ence jornalistica enzaul anter edemanal y cuotidian – sciche al é dal 1990 encá, da sen 30 agn. Per chest iubi­leum de 30 agn onse na scincun­da: i pers che se marida en chest ann 2020 po ciafé l abonament debant (per n ann alalongia), perchel fajesse inant y manede na e-mail!  (de Iaco Rigo, diretour)