La Usc di Ladins

I leri é tres indó en aziun ince tles valades ladines. Por fortüna garetera alüsc ince da i abiné, sciöche al é sozedü te Gherdëna. Aladó de n comunicat mené fora dal Comane Provinzial di Carabiniers, é les forzes dl ordin de Sëlva y Urtijëi stades bunes da abiné trëi zitadins slovacs che abitâ a Balsan, che â arobé te almanco trëi hotí de Sëlva. Ara se trata de n ël de 20 agn y döes ëres de 22 y 27 agn, che é stá bugn da rové tles ciamenes de ghesć y arobé fonins, aparac eletronics y scioldi por incër 6.500,00€.
Süa "tecnica" ê dër scëmpla – scrí i Carabiniers – ai fajô finta da ester sciori y s’la scufinâ ti hotí tratan i orars che al ê le maiú noto, scialdi danter les 16:30 y les 18:00, se moscedan danter la jënt. Ai ê vistis bun, de bela presënza y ince de cherianza, mo les intenziuns ê döt d’atres: tratan che dui se rodâ jö les ciamenes di ghesć, n’êl un che stê a vardé che al ne gniss nia zacai. So procedere ê asvelt y avisa: te un n cajo ési stá cinamai ma püc secunc, te chi che ai á sciafié da s’arobé n tablet y n smartphone. I leri án abiné fora tres les telecameres di hotí. Ai é düc trëi gnüs dá dant y spo desgorc dala provinzia de Balsan.  (pablo)