La Usc di Ladins

La nutizia che ie vëira ie che ntant ie cater de sies dutores de familia che ie te Gherdëina n carantena. Bonamënter seméiel nce vester vëira che i prim caji de Coronavirus atestei te Gherdëina ie stac te Sëlva.

Dut possa vester, y on nce damandà do, ma: nia ufiziel ne n’iel che te Sëlva y Santa Cristina iel plu caji de Coronavirus che no a Urtijëi, Sacun y Ciastel. Nia ufiziel ne n’iel niancanó che Gherdëina à plu caji de Coronavirus che l’autra valedes ladines. Niancanó sce l ie, te Gherdëina, cater dutores n carantena.

Nia ufiziel ne n’iel niancanó che te Sëlva y Santa Cristina iel plu caji de carantenes "turistiches" che no a Urtijëi, Sacun y Ciastel. Nia ufiziel ne n’iel niancanó che Gherdëina à plu caji de carantenes "turistiches" che l’autra valedes ladines.

Tlo iel massa spiculazion, y dantaldut na gran iniuranza, che porta mé a zeche: a ti mëter su l stigma a n valguni. Propi per schivé duta ch’sta spiculazion y stigmatisazion ne à la istituzions cumpetëntes cuntatedes nia dat ora i dac avisa, almanco mo.

Co pòssen pa raté che te n raion tan pitl coche Gherdëina pòssel vester desferënzies scialdi senificatives danter una o l’autra pert dla valeda? Co pòssen pa raté che te n raion tan pitl coche la Ladinia pòssel vester desferënzies scialdi senificatives danter una o l’autra dla valeda?

Moral dla storia. Per ntant se tenions l Coronavirus, ma cialon almanco de lascé da na pert iniuranza y stigma.

Comentar de David Lardschneider

Foto: Sëlva.